Gjanica është ndotur sërish nga derdhja e hidrokarbureve, një fenomen shqetësues ky që përsëritet prej vitesh. Lumi në gjithë gjatësinë e vet, është kthyer në zonë të nxehtë të ndotjes mjedisore, pasi mbizotëron era e rëndë e hidrokarbureve që reflekton ngjyrën e errët.
Qytetarët denoncojnë publikisht ndotjen e frikshme që po shkakton probleme për shëndetin e tyre, por asnjë masë nuk është marrë.
"Kam shtëpinë 500 metra larg. Ndotja është shumë e madhe duhet që qeveria të bllokojë atë impiantin që derdh mbeturina. Ndjehet era e rëndë dhe është i dëmshëm se ka fenole është i dëmshëm për gjakun dhe kockat", tha një banor.
I vetëdijshëm për këtë situatë është dhe kryebashkiaku i Fierit, Armand Subashi i cili heq përgjegjësinë nga vetja dhe shprehet se institucionet ligjzbatuese duhet të ndëshkojnë kompanitë që operojnë në nxjerrjen dhe përpunimin e naftës.
"Ndotja e lumi është prezente nga disa kompani dhe besoj se shtrëngimi i masave në këtë drejtim nga institucionet ligjzbatuese dhe nga investimet që këto kompani duhet të kryejnë edhe nga pikëpamja mjedisore. Jam i kënaqur besimplotë dhe do të mundim të realizojmë gjithë rehabilitim dhe ta kthejmë në një shëtitore", u shpreh Subashi.
Edhe pse ndotja e lumit Gjanica është një fenomen i përsëritur Inspektorati i Mjedisit nuk marrë asnjë masë për të gjobitur apo pezulluar licencat e këtyre kompanive.
