Kryeministri i Spanjës, Pedro Sánchez, ka njoftuar një plan 10-pikësh për të përgatitur vendin për emergjencën klimatike, duke paralajmëruar: “Nëse nuk duam t’u lëmë trashëgimi fëmijëve tanë një Spanjë gri nga zjarri dhe flakët, ose një Spanjë kafe nga përmbytjet, atëherë na duhet një Spanjë më e gjelbër.”
Sánchez tha se zjarret e shkaktuara nga vala e të nxehtit e gushtit - të cilat vranë katër persona dhe dogjën një zonë gjashtë herë më të madhe se Ibiza, treguan se duhet të merren masa të menjëhershme për të zbutur efektet e krizës klimatike.
Ai tha se pritja më gjatë do të ishte e rrezikshme dhe e kushtueshme, dhe kritikoi ata që mohojnë realitetin e ngrohjes globale në Spanjë. Gjatë pesë viteve të fundit, tha ai, emergjenca klimatike shkaktoi më shumë se 20,000 vdekje dhe kjo i kishte kushtuar buxhetit publik 32 miliardë euro (28 miliardë paund).
“Ne duhet të mobilizohemi si shoqëri kundër ndryshimeve klimatike, të cilat janë një armik i përbashkët që shtrihet përtej ideologjive. Ndryshimet klimatike vrasin. Dhe kjo është arsyeja pse duhet të jemi të vetëdijshëm për gjithçka që ato përfaqësojnë në aspektin e pasigurisë dhe në aspektin e rreziqeve që paraqesin për jetën tonë.
Mohimi i ndryshimeve klimatike që vjen nga një pjesë e rëndësishme [e shoqërisë] - dhe që po rritet si rezultat i gënjeshtrave të përhapura në rrjetet sociale nga disa anëtarë të klasës sonë politike - është po aq i pakuptueshëm sa edhe shqetësues”, tha ai.
Sánchez propozoi një sërë iniciativash, duke përfshirë një agjenci shtetërore të mbrojtjes civile për të koordinuar reagimet ndaj krizave, një rrjet strehimesh klimatike në të gjithë vendin dhe një ripërcaktim të menaxhimit të pyjeve dhe përdorimit të tokës. Vetëm duke vepruar tani, tha ai, vendi mund të shpresojë të shmangë fatkeqësi të ngjashme ose të zvogëlojë ndikimet e tyre.
“Mundësia më e madhe që kemi tani është të shmangim këtë tragjedi - dhe për ta bërë këtë, duhet të bëjmë siç këshilloi dikur një president amerikan kur tha se momenti për të rregulluar çatinë është kur shkëlqen dielli dhe jo kur bie shi”, theksoi kryeministri.
"Mendoj se ai kishte të drejtë, sepse këto zjarre të gjeneratës së gjashtë që kanë djegur më shumë se 300,000 hektarë në vendin tonë nuk shuhen në verë; ato shuhen në dimër dhe në vjeshtë. Ato shuhen duke punuar gjatë gjithë viti", shtoi ai.
Masa të tjera në “paktin shtetëror për t’iu përgjigjur emergjencës klimatike” të qeverisë së udhëhequr nga socialistët përfshijnë fonde për t’u përgatitur dhe për të rindërtuar pas fatkeqësive që lidhen me klimën, përmirësime në kapacitetin e zjarrfikësve, një plan për të rritur qëndrueshmërinë ndaj ujit përballë përmbytjeve dhe thatësirave, si dhe iniciativa për të luftuar shpopullimin rural dhe kështu për të ndihmuar në mbajtjen e tokës të pastër nga materialet e djegshme.
Sánchez tha se bujqësia do të luante gjithashtu një rol të rëndësishëm në luftimin e krizës klimatike, duke treguar përfitimet e bujqësisë, kullotjes së kujdesshme dhe ujitjes efikase. Dy masat e fundit janë promovimi i një “kulture qytetare parandaluese dhe reagimi” dhe përshpejtimi i tranzicionit të gjelbër. Plani do të miratohet në kabinet të martën dhe do të dalë për konsultim publik./The Guardian
Komente
