Më shumë mbetje u prodhuan vjet në Shqipëri. Çdo banor prodhoi mesatarisht 360 kilogramë mbetje ose gati 9 kilogramë më shumë se në 2023-shin.
Në total vitin e kaluar sipas të dhënave të Institutit të Statistikave u menaxhuan gjithsej 862,241 tonë mbetje, me një rritje prej 2,14 % krahasuar me vitin 2023. Ndikim në shtimin e mbetjeve ka dhënë edhe bumi turistik i vitit të shkuar, që u shoqërua me konsum më të lartë.
Janë mbetjet familjare dhe të ngjashme me to ato të cilat zënë përqindjen më të lartë ose 771 mijë tonë, dhe më pas janë mbetjet plastike dhe ato prej kartoni e letre. Edhe pse volumi i mbetjeve të prodhuara po rritet vit pas viti, menaxhimi i tyre po bëhet me të njëjtat kapacitetet dhe me të njëjtën metodologji, ku depozitimi në landfille mbetet ‘shpëtim’.
“Riciklimi i mbetjeve ka mbetur pothuajse i pandryshuar, ndërsa depozitimi në landfille vazhdon të dominojë si metoda kryesore. Përbërja e mbetjeve urbane ka ruajtur të njëjtën strukturë ndër vite, me rritje të lehtë të plastikës dhe metaleve”, thotë INSTAT.
E përkthyer në shifra 76.3% e mbetjeve u depozituan në landfille, 18.8% u ricikluan dhe 4.9% u dogjën në inceneratorin e Elbasanit dhe u prodhua energji.
Për shkak të impaktit tejet të ulët të inceneratorëve në pastrimin e vendit, qeveria planifikon të ndryshojë mënyrën e menaxhimit të mbetjeve.
Në projektligjin e ri të ‘Menaxhimit të Integruar të mbetjeve’ trajtimi do të nisë nga parandalimi, ripërdorimi, riciklimi, rikuperimi, trajtimi përfundimtar. Pra pastrimi i territorit nuk do të ketë si prioritet inceneratorët por riciklimin e tyre, me qëllim përfitimin edhe prej mbetjeve, për të arritur ekonominë qarkulluese.
Komente
Shtypi nuk duhet te publikoje vetem statistika,por duhet ti "ballafaqoje" ato edhe me vendet e BE'se,aty ku duam te "shkojme" ....... Gjithashtu te ngreje dhe artikuloje probleme ...... Vetem dy shifra dhe gjykoni : Ne vitin 2023 (kjo gjendet),mesatarja e mbetjeve te "prodhuara" per banor ne vendet e BE'se,ishte 511 kg,POR,48 % e tyre u ricikluan !! Po Ne ku jemi ? ..... RICIKLIMI eshte problemi me i madh,i cili rrezikon shume seriozisht vendin tone,me siperfaqe relativisht te kufizuar dhe "ambicie" per Turizem ! Rruga e Dibres
Përgjigju