Një 31-vjeçar është arrestuar nga policia e Kukësit, pasi është kapur duke shpërndarë droga të forta. Megjithëse ishte nën masën ‘arrest shtëpie’, kjo nuk e pengonte 31-vjeçarin me iniciale S.E, të shpërndante kokainë në sasi të vogla.
Gjatë kontrollit në banesën e këtij shtetasi, policia gjeti dhe sekuestruan një sasi me lëndë të dyshuar narkotike kokainë, një sasi me lëndë të dyshuar narkotike kanabis, 3 aparate celulare, 1 automjet tip "BMW", 3380 euro dhe një sasi lekësh.
31-vjeçari ishte me masë sigurie “Arrest në shtëpi” për veprën penale “Shkelja e rregullave të qarkullimit rrugor”.
Operacioni vijon për identifikimin dhe kapjen e personave të tjerë të përfshirë në organizimin e kësaj veprimtarie kriminale.
Materialet i kaluan Prokurorisë së Rrethit Gjyqësor Kukës, për veprime të mëtejshme.
