KORÇË- Një 26-vjeçar është arrestuar nga policia në Maliq dhe vëllai i tij është shpallur në kërkim pasi, janë kapur me armë pa leje dhe kanë kultivuar bimë narkotike, Policia njofton se është arrestuar në flagrancë të shtetasit R. M., 26 vjeç, banues në fshatin Selcë, Maliq dhe është shpallur në kërkim vëllai i tij shtetasi D. M., 21 vjeç, banues në Libonik, Maliq.
Gjatë kontrollit të ushtruar në banesën dhe ambientet përreth saj në pronësi të shtetasve të mësipërm, u gjetën 1 armë zjarri tip kallashnikov, një sasi me municione luftarake, 2 krëhëra dhe 2 bajoneta arme zjarri, të cilat u sekuestruan në cilësinë e provës materiale.
Gjithashtu u konstatuan edhe disa fidanë të dyshuar kanabis, të cilat dyshohet të jenë kultivuar nga dy vëllezërit në bashkëpunim me njëri-tjetrin.
Materialet në ngarkim të tyre i kaluan Prokurorisë pranë Gjykatës së Shkallës së Parë Korçë, për veprat penale "Armëmbajtja pa leje" dhe "Kultivimi i bimëve narkotike", të kryera në bashkëpunim.
