Eurodeputetja Eva Kaili , e cila qëndron në paraburgim në burgun e grave Haren në Bruksel, ka pasur rastin të takojë sot vajzën e saj dyvjeçare. Kaili wshtw e akuzuar për pjesëmarrje në skandalin e njohur Katargate, që po trondit Parlamentin Evropian.
Babai i saj, Alexandros Kailis, kaloi pragun e burgut duke shoqëruar mbesën e tij për takimin e parë me nënën e saj që nga dita e arrestimit dhe ndalimit të Kailit.
Kaili kishte bërë një kërkesë nëpërmjet avokatëve të saj për t'u lejuar të takohej me vajzën e saj dyvjeçare, e cila u pranua nga autoritetet gjyqësore belge dhe pasditen e sotme ky takim u bë fakt.
Ish-zëvendëspresidentja e Parlamentit Evropian kishte kërkuar që të takonte vajzën e saj dyvjeçare disa ditë në burg ose ta takonte me Skype, teksa ajo është me gjyshin.
Momenti kur babai i Eva Kailit shoqëron mbesën
Që prej 9 dhjetorit, burimet e IT-së të 10 punonjësve të parlamentit janë “ngrirë” për të parandaluar zhdukjen e të dhënave të nevojshme për hetimin. Katër të dyshuarit e arrestuar nga policia belge janë akuzuar për "pjesëmarrje në një organizatë kriminale, pastrim parash dhe korrupsion". Prokurorët në Greqi kanë ngrirë të gjitha pasuritë e zonjës Kaili. Gjashtë persona u arrestuan si pjesë e hetimit mbi akuzat se Katari korruptoi zyrtarët e BE-së për të fituar ndikim. Dy u liruan më vonë, duke lënë në pranga vetëm 4 zyrtarë të Parlamentit Europian.
