DURRËS- Një 45-vjeçare është arrestuar në qytetin e Durrësit, pasi rezultonte e shpallur në kërkim ndërkombëtar nga Italia, si pjesë e një grupi kriminal që trafikonte drogë në Itali.
Bëhet fjalë për 45-vjeçaren Edisnarda Shapka, e cila ndryshe njihej edhe me emrin Edisnajda Shapka.
Gjykata e Bolonjës ka caktuar ndaj saj masën e sigurisë “Arrest në burg” për veprën penale “Trafikimi i narkotikëve”, kryer në kuadër të organizatës kriminale.
"Finalizohet një tjetër operacion nga Drejtoria e Forcës së Posaçme Operacionale në Departamentin e Policisë Kriminale në DPPSh, për kapjen e personave të shpallur në kërkim ndërkombëtar. “Operacionalja 19” çon në pranga një 45-vjeçare, e akuzuar për pjesëmarrje në organizatë kriminale në Itali, për trafikim të lëndëve narkotike.
Si rezultat i informacioneve të siguruara nga inteligjenca policore për vendndodhjen e një shtetaseje të shpallur në kërkim ndërkombëtar për llogari të Italisë, Drejtoria e Forcës së Posaçme Operacionale, gjatë operacionit policor të koduar “Operacionalja 19”, kapi në qytetin e Durrësit dhe vuri në pranga, me qëllim ekstradimi, shtetasen Edisnarda Shapka, alias Edisnajda Shapka, 45 vjeçe, lindur dhe banuese në Durrës", njoftoi Policia e Shtetit më 13 tetor 2024.
Ndërkohë, pritet që autoritetet e dy vendeve të nisin procedurat e ekstradimit për 45-vjeçaren.
