Italia do të kryesojë G7, ku grupohen gjithashtu Shtetet e Bashkuara, Japonia, Gjermania, Britania, Franca dhe Kanadaja, gjatë gjithë vitit 2024 dhe do të presë një samit në qershor.
"Italia do të përdorë presidencën e saj të G7 për të sfiduar idetë në rritje se Rusia po fiton në Ukrainë dhe se Perëndimi është i lodhur nga lufta", tha një burim i njohur me planet e Italisë G7.
Duke paraqitur për herë të parë prioritetet e Italisë, burimi tha se çështjet thelbësore në axhendën e liderëve do të përfshijnë konfliktin në Lindjen e Mesme, sigurinë ushqimore, ndryshimet klimatike, zhvillimin në Afrikë, angazhimin me Kinën dhe Inteligjencën Artificiale, raporton Reuters.
Mbështetja e dikurshme e Perëndimit për Kievin gjatë kohës së luftës është dukur të lëkundet në muajt e fundit mes grindjeve politike në Uashington dhe Bruksel që ka penguar shpërndarjen e armëve dhe fondeve shumë të nevojshme.
Megjithatë, burimi tha se udhëheqësit e G7 ishin të vendosur të tregonin se mbeten plotësisht të përkushtuar ndaj Kievit dhe nuk mund të rrezikojnë të shfaqin shenja dobësie dy vjet pasi Rusia pushtoi fqinjin e saj.
"Ne duhet të ndryshojmë narrativën për Ukrainën", tha burimi, duke shtuar se presidenti rus Vladimir Putin kishte humbur një ndikim të rëndësishëm financiar, ushtarak dhe diplomatik që nga pushtimi.
Italia po planifikon të organizojë 20 takime ministrore gjatë presidencës së saj të G7, duke filluar me një mbledhje tre-ditore nga 13-15 mars mbi industrinë, teknologjinë dhe dixhitalizimin, e cila do të vërë në qendër të vëmendjes revolucionin e shpejtë të AI.
