Titulli: “Avni Mula – Romanca (1960-1975)”
Autor: Avni Mula
Shtëpia Botuese: Toena
Çmimi: 1700 lekë
Nga “Agimet shqiptare” te “Fluturo në kaltërsi” e “Koncert Pranveror”, romancat e para të artistit Avni Mula, gjatë viteve ’60 deri në ’75-ën vijnë në një botim të përgatitur nga e bija Adelina Qerfozi, ndërsa partiturat të digjitalizuara nga muzikanti Alqi Lepuri.
Me tekste të figurave të njohura si Luigj Gurakuqi, Bekim Harxhi dhe Shaban Murati këto kompozime të Mulës, do të pasohen me 2 vëllime të tjera, pjesë e një antologjie të plotë që të bijat artiste, Adelina dhe Inva, po i bëjnë veprës së tij.
Titulli: “Konteksti Rajonal i Aleancës Strategjike Shqipëri-Turqi”
Autor: Shaban Murati
Shtëpia Botuese: Albas
Çmimi: 1000 lekë
Me mbi 55 përvojë në fushën e politikës së jashtme, diplomati Shaban Murati sjell për lexuesit librin e tij më të fundit “Konteksti Rajonal i Aleancës Strategjike Shqipëri-Turqi”.
Në 245 faqe të botimit, përmblidhen shkrime analitike të lidhura ngushtë me zhvillimet në dekadat e fundit. Ish ambasadori zbërthen ndër të tjera, aleancat Ballkanike, përjashtimin që i bëhet Shqipërisë dhe “faktorë të jashtëm” që duan ta lënë vendin tonë të izoluar politikisht.
Titulli: “Peshkatarët e fjalëve”
Autore: Chiara Sorrentino
Shtëpia Botuese: Mediaprint
Çmimi: 750 lekë
Fjalë që kanë mbetur pezull në ajër dhe një anije peshkatarësh që lundron çdo natë në qiell me një rrjet të thurur nga yjet për t’i peshkuar. Autorja italiane për fëmijë Chiara Sorrentino zgjedh këtë fabul magjepsëse, për t’u mësuar fëmijëve rëndësinë e fjalëve.
Një rrëfim i sjellë në shqip nga Arta Marku, i pasur me shprehje e figuracion ku fantazia e fëmijëve ngacmohet nga ilustrimet e kuruara.
