“Shtëpia e verdhë” nga Bashkim Hoxha, “Shi me baltë” nga Mero Baze dhe “I rënë nga qielli” nga Tom Kuka janë titujt e ri që sugjerojmë në rubrikën “Në librari” në Report TV.
Titulli: Shtëpia e verdhë
Autor: Bashkim Hoxha
Gjinia: Roman
Botues: Onufri
Çmimi: 1200 lekë
Një regjisor, një drejtor i fotografisë, një skenar filmi dhe përballë shtëpia e verdhë dhe Ballkani i trazuar midis të vërtetave dhe trillimeve janë pjesë e ngjarjes në romanin e fundit të shkrimtarit Bashkim Hoxha, “Shtëpia e verdhë”.
Lufta çlirimtare e popullit të Kosovës, por dhe makinacionet e mëtejshme për ta bërë pis fitoren e UÇK-së, prej vitesh e trazonin ndërgjegjen e autorit Hoxha, por edhe atë të gazetarit.
Ky roman është argumenti për të treguar një problem që është bashkëkohor sot, ai i fake neës (lajmeve të rreme) dhe ai i deformimit të realiteteve dhe i përdorimit të propagandës si mjet lufte.
Titulli: Shi me baltë
Autori: Mero Baze
Gjinia: Poezi
Botues: UET Press
Çmimi: 1000 lekë
“Shi me baltë” titullohet libri me poezi me autor Mero Baze. Ky libër me poezi cilësohet si një poemë elegjiake me katër pjesë nga Ilirjan Zhupa në parathënien e botimit, që ka vetëm pak ditë që ka dalë në qarkullim. Poezitë e Bazes sipas tij i këndojnë humbjes, asaj të përgjithshmes, asaj të priturës dhe asaj të stisurës. Braktisjes së gjërave të shtrenjta, botës që na ikën përditë, na shket nga sytë, nga duart, nga mendja e nga shpirti si rëra...
Titulli: I rënë nga qielli
Autori: Enkel Demi (Tom Kuka)
Botues: Pegi
Çmimi: 1000 lekë
Romani përshkruan në mënyrë të pamëshirshme një periudhë të rëndë në historinë e Shqipërisë përmes një galerie personazhesh, që nga banditët e rrugëve e deri te diplomatët e huaj. Në këtë libër përzihen bashkë partizanët, nacionalistët, aleatët, pushtuesit, Sigurimi i Shtetit, bandat e ’97-ës. Shqipëria është në luftë, më pas paqen e kalon si në luftë dhe në fund hyn sërish në luftë.`
