NIKOLLA, MONOGRAFI PËR “ANTIKULTURËN” E ‘68-S NË SHQIPËRI
Titulli: Antikultura e ’68-s në Shqipëri
Autori: Albert P. Nikolla
Shtëpia botuese: UET Press
Çmimi: 1500 lekë
“Antikultura e ’68-s në Shqipëri” është një qëmtim në ngjarjet e 1968, të asaj se çfarë ndodhi në ShBA dhe Europë, për t’u reflektuar në disa elementë të përditshëmrisë së shqiptarëve. Një manastir katolik i mbyllur, gati në degradim të plotë, në Trento të Italisë do të bëhej shkak i nisjes së një hulumtimi të gjatë, i cili u finalizua me botimin e librit “Antikultura e 68-s në Shqipëri”.
Ishin vitet ’97-2001 kur autori po ndiqte studimet e lartë në Padova. Gjatë një kursi në Universitetin e Trentos, ai zhvilloi një vizitë në qytetin historik të rrethuar nga malet dhe u ndesh me manastirin e shkatërruar nga studentët në vitin 1968. Kjo ngjarje i shkaktoi ngacmim. Duke gërmuar mes historish zbuloi një sërë zhvillimiesh, që kishin të përbashkët vetëm vitin 1968: 8 studentë ishin vrarë në Beograd; në Shkup për herë të parë ishte marrë leje nga qeveria jugosllave për të përdorur simbolet kombëtare shqiptare; në Prishtinë ishte futur termi universitet. Po në Shqipëri komuniste, çfarë kishte ndodhur?
Në librin e tij me pesë kapituj, Nikolla e “shëtit” lexuesin në një periudhë të rëndësishme historike, duke e dërguar në ShBA, Amerikë Latine, Europë Perëndimore e atë Lindore. Së fundi ai kthehet në Shqipëri ku vë re se kishte pasur disa iniciativa të filluara nga vete Enver Hoxha, për të cilin autori thotë se do të përdorte metodën e “kulaçit dhe kërbaçit”.
“SHTËPIA E ZËRAVE”, NJË LIBËR PËR KUJTESËN DHE IDENTITETIN
Titulli: Shtëpia e zërave
Autori: Donato Carrisi
Përktheu: Xhimi Lazri
Shtëpia botuese: Toena
Çmimi: 1500 lekë
Pietro Xherberi nuk është një psikolog si gjithë të tjerët. Ai është i specializuar në praktikën e hipnozës te fëmijët. Pacientët e tij të vegjël shpesh kanë pësuar trauma, kanë përjetuar ndodhi dramatike ose disponojnë të dhëna të rëndësishme në kujtesën e tyre të brishtë e që policia dhe prokuroria i shfrytëzojnë për hetime. Në këtë fushë, Pietroja është më i miri në tërë Firencen, ku njihet edhe si ai që përgjum fëmijët. Por, kur nga ana tjetër e botës i telefonon një kolege australiane dhe i rekomandon një paciente, Pietroja është i ndërdyshur dhe mosbesues. Hana Holl është e rritur. Në kujtesë, Hana ka të gjallë një vrasje, e cila mund të mos ketë ndodhur. Këtu zë fill pjesa e parë e triologjisë së autorit Donato Carrisi, “Shtëpia e zërave”, e cila së fundmi vjen edhe në shqip.
“HASMËRITË QË TRONDITËN TIRANËN E 1800-S” NË ARKIVAT OSMANE
Titulli: Hasmëritë që tronditën Tiranën e 1800-s
Autori: Rezarta Delisula
Shtëpia botuese: Maluka
Çmimi: 1000 lekë
“Hasmëritë që tronditën Tiranën e 1800-s” është libri i ri i gazetares Rezarta Delisula, i cili i vendos ngjarjet në Tiranën e viteve 1800, duke treguar sherrnajat e familjeve me autoritet të asaj kohe nëpërmjet dokumenteve të arkivave osmane.
Histori e dëshmi të ruajtura në arkiva nxjerrin në dritë anë të panjohura të historisë së qytetit në shekullin e 18-të. Dy vite më parë, Delisula publikoi librin “Çfarë ka qenë Tirona”, ndërsa në 2018-ën, librin e parë “Tirana-Mahnia”.
