Dhjetëra të vdekur dhe qindra të plagosur në rajonin bregdetar të Latakias kanë rikthyer vëmendjen te Siria e presidentit të ri, Ahmed al-Sharaa, lideri i Hayat Tahrir al-Sham, i cili në dhjetorin e kaluar rrëzoi regjimin pesëdhjetëvjeçar të Assadëve. Këto ngjarje tregojnë se Siria mbetet ende një fuçi baruti.
Masakra në qytetet e alavitëve
Sipas burimeve lokale dhe Observatorit Sirian për të Drejtat e Njeriut me qendër në Londër, të paktën 70 persona janë vrarë në përplasjet mes forcave qeveritare dhe milicive të lidhura me regjimin e vjetër, që kanë shpërthyer në Latakia, Tartus dhe periferinë e Homsit. Raportet më të fundit flasin për një numër më të lartë viktimash, deri në 147 të vdekur, por këto të dhëna ende duhet të verifikohen. Imazhet që qarkullojnë tregojnë dhjetëra trupa të pajetë në rrugë. Është e qartë se dhuna ka shpërthyer në një rajon që njihet si bastioni i mbështetësve të regjimit të vjetër dhe ku prania e minoritetit alavit është e konsiderueshme.
Sulmi i planifikuar të enjten
Situata u përkeqësua të enjten kur në qytetin bregdetar Jabaleh dhe fshatrat përreth, patrullat qeveritare u sulmuan nga milicë lokalë që, sipas autoriteteve të Damaskut, janë mbështetës të Assadit. "Ishin prita të mirëplanifikuara dhe të paramenduara kundër pozicioneve dhe pikave tona të kontrollit nga grupe të ndryshme assadistësh", tha Mustafa Kneifati, një oficer i forcave të sigurisë në Latakia. Sipas Observatorit Sirian, në këto përleshje të para humbën jetën 48 persona (16 ushtarë të qeverisë, 28 mbështetës të Assadit dhe 4 civilë). Këto u cilësuan si “sulmi më i dhunshëm ndaj qeverisë së re që nga rënia e regjimit”.
Reagimi i Sharaas
Përgjigja e qeverisë së Sharaas, ish-udhëheqësi i Al-Kaedës i njohur si al-Jolani, ka qenë e ashpër dhe ende vazhdon. Nga Damasku janë dërguar njësi të shumta ushtarake, automjete të blinduara dhe helikopterë. Në Beit Ana, banorët panë sulme me artileri dhe raketa nga helikopterët kundër personave të armatosur, të cilët dyshohet se janë besnikë të gjeneralit Suhail al-Hassan, i njohur si “Tigri” dhe i konsideruar si “ushtaraku i preferuar i Assadit”.
Liderët e komunitetit alavit në Facebook kanë denoncuar vrasje të paudhëta të civilëve dhe ekzekutime në rrugë. Ata kanë bërë thirrje për protesta paqësore kundër sulmeve ajrore që “kanë goditur shtëpitë tona”.
Arrestimi i një agjenti të Assadit
Agjencia shtetërore e lajmeve të Sirisë, SANA, raportoi se gjatë operacionit ushtarak të ndërmarrë nga qeveria e Damaskut për të rimarrë kontrollin, është arrestuar në Jabaleh gjenerali Ibrahim Huweija, ish-shefi i inteligjencës ajrore të regjimit. Ai konsiderohet përgjegjës për shumë krime gjatë sundimit të Hafez al-Assad, babai dhe paraardhësi i Bashar al-Assadit.
"Është hera e parë që besnikët e Assadit veprojnë në mënyrë të organizuar dhe të planifikuar kundër qeverisë së re", vë në dukje Charles Lister, drejtori i programit kundër terrorizmit në Middle East Institute.
Shtetrrethimi dhe apeli rus
Forcat e sigurisë kanë shpallur shtetrrethim në zonat e banuara nga alavitët, përfshirë Latakian, portin e Tartusit dhe Homsin, qytetin e tretë më të madh të Sirisë. Në Tartus ndodhet ende baza detare ruse, dhe për këtë arsye Kremlini ka bërë thirrje për uljen e tensioneve. “Jemi të shqetësuar”, tha zëdhënësja e Ministrisë së Jashtme ruse, Maria Zakharova. “Ftojmë të gjithë liderët sirianë të bëjnë gjithçka për t’i dhënë fund masakrës. Moska konfirmon mbështetjen e saj për sovranitetin dhe integritetin territorial të Sirisë”.
Ndërkohë, që nga dhjetori, Bashar al-Assad dhe bashkëshortja e tij, Asma, jetojnë në ekzil në Moskë./ La Repubblica
Komente
