Nesër 24 mijë vogëlushë ulen për herë të parë në bankat e shkollës dhe 386 mijë në total. Teksa na ndan vetëm një ditë nga fillimi i vitit të ri shkollor 2019-2020, prindërit janë dyndur nëpër dyert e dyqaneve për finalizuar edhe përgatitjet për fëmijët e tyre, përgatitje të cilat nisin të paktën 10 ditë më përpara. Mirëpo sa kushton dita e parë e shkollës?
Përgjigjen e japin vetë prindërit, të cilët teksa kujtojnë me nostalgji ditën e tyre të parë në shkollë, shprehen se kërkesat e fëmijëve sa vijnë dhe shtohen duke u bërë të papërballueshme për familjet shqiptare.
“Ne përshembull e blenim lapsin atëherë 50 lekë (të vjetra), ndërsa sot e blejmë nga 200-500 lekë (të vjetra). Veçse ne si prindër jemi të detyruar t’ju blejmë dhe tua plotësojmë kushtet” shprehet nëna e një 15-vjeçari.
“Ne i kishim gjërat më të sakta dhe ishim më të përqendruar në gjërat që na duheshin, ndërsa sot janë më të shpërqendruar. Kalamajt nuk mbarojnë ndonjëherë, shyqyr që nuk na kërkojnë ndonjë aeroplan” pohoi një prind.
Sipas informacioneve të dhëna nga vetë ata vetëm kostot e librave të shkollës variojnë nga 5 mijë lekë të reja deri në 8 mijë lekë, duke nisur nga klasa e 6-të e deri në ciklin e mesëm.
“Për familjet shqiptare faktikisht nuk janë të përballueshme. Megjithatë prindërit mundohen që të mos iu lënë gjë mangut, të heqin ndoshta edhe nga racioni ushqimor”.
Normalisht librat kushtojnë, rrobat kushtojnë por gjithë problemi qëndron se është shpenzim i menjëhershëm. Kam tre fëmijë në shkollë nga 70 janë librat pluse edhe nga 100 rrobat, kushtojnë” deklarojnë prindërit.
Mirëpo artikujt shkollor duhet të plotësohen me materialet e tjera bazë, që nisin nga stilolapsat, lapsa, fletore apo edhe vizoret të cilat mesatarisht të mbledhura bashkë kushtojnë 1500 lekë të reja. Po ashtu çanta është një mjet i pashmangshëm, që minimalisht kushton 1 mijë lekë, dhe çmimet arrijnë deri në 3-4 mijë lekë.
Më pas shpenzimet më të mëdha bëhen për veshjet e fëmijëve, ku një familje harxhon për fëmijën mesatarisht 5 – 7 mijë lekë të reja. Kostoja e përafërt që mund të shpenzojë një familje për ditën e parë të shkollës arrin në rreth 20 mijë lekë të reja, ndërkohë që paga minimale në Shqipëri është 26 mijë lekë.
