Netflix ka përdorur për herë të parë efekte vizuale të krijuara nga inteligjenca artificiale gjenerative (AI) në një nga serialet e saj origjinale.
Bashkë-drejtuesi ekzekutiv i platformës së transmetimit, Ted Sarandos, tha se AI, e cila krijon video dhe imazhe bazuar në komanda të dhëna, është përdorur për të realizuar një skenë me shembjen e një ndërtese në serialin fantastiko-shkencor argjentinas The Eternauts.
Sipas tij, kjo teknologji i ka lejuar ekipit të prodhimit të përfundojë skena të caktuara më shpejt dhe me kosto më të ulët.
Përdorimi i inteligjencës artificiale gjenerative ka ngjallur debate në industrinë e argëtimit, për shkak të shqetësimeve se krijon përmbajtje duke u bazuar në punën e të tjerëve pa miratimin e tyre, si dhe për frikën se do të zëvendësojë punën e njerëzve.
Sarandos bëri këto komente teksa Netflix njoftoi një rritje prej 16% të të ardhurave, që arritën në 11 miliardë dollarë (rreth 8.25 miliardë paund) për tremujorin e dytë të këtij viti, krahasuar me të njëjtën periudhë të vitit të kaluar. Fitimet u rritën nga 2.1 miliardë dollarë në 3.1 miliardë dollarë.
Sipas kompanisë, ky rezultat më i mirë nga sa pritej u ndikua ndjeshëm nga suksesi i sezonit të tretë dhe të fundit të thrillerit jugkorean Squid Game, i cili ka arritur deri tani 122 milionë shikime.
I pyetur për përdorimin e AI nga Netflix, Sarandos tha se teknologjia u ka mundësuar prodhimeve me buxhete më të vogla të përdorin efekte vizuale të avancuara.
Në rastin konkret, AI e përdorur në The Eternauts e ndihmoi ekipin të realizonte një sekuencë që tregonte shembjen e një ndërtese në Buenos Aires dhjetë herë më shpejt sesa nëse do të përdornin mjetet tradicionale të efekteve speciale, tha ai.
“Kostoja për realizimin e kësaj skene me metodat klasike do të ishte e papërballueshme për një serial me atë buxhet.
Në fakt, kjo sekuencë është e para pamje përfundimtare e krijuar me AI gjenerative që shfaqet në ekran në një serial apo film origjinal të Netflix. Krijuesit ishin shumë të kënaqur me rezultatin,” u shpreh Sarandos.
AI ishte një ndër shqetësimet kryesore të ngritura gjatë grevës së industrisë së Hollivudit në vitin 2023.
Gjatë grevës tre mujore, sindikata e aktorëve dhe artistëve të televizionit dhe radios (SAG-AFTRA) kërkoi që të vendosen rregulla më të rrepta për përdorimin e inteligjencës artificiale.
Komente
