Vetëm një ditë pas Pashkëve dhe në ditën e ndarjes nga jeta të Papa Françeskut, poeti durrsak Rei Hodo ka përuruar vëllimin e tij të tretë poetik, të titulluar “Blu Psalm”. Ceremonia është zhvilluar në Kishën Katolike të Shën Luçisë në Durrës, ndërkohë që zgjedhja e datës dhe vendit për promovimin nuk ishte rastësore.
Në intervistën e tij, Hodo shpjegoi se kjo ditë ishte e përzgjedhur enkas nga ai, si një homazh për gjyshen e tij, të cilën ai e quan me përkëdheli “nanushë”.
“Përurimi përkoi me Pashkët dhe me ndarjen nga jeta të Papa Françeskut. Shpreh ngushëllimet për komunitetin katolik dhe të gjithë besimtarët. Ndoshta një ogur i mirë, ose ndoshta jo për librin”, tha autori.
I pyetur për planet e tij të ardhshme, Hodo u shpreh se nuk dëshiron të kufizohet vetëm në zhanrin e poezisë. Ai la të hapur mundësinë që në të ardhmen të shtrihet edhe drejt prozës, duke theksuar se kjo mbetet për t’u parë.
Ky vëllim poetik, i treti në karrierën e Hodos, pason botimet e mëparshme “Apricus” dhe “Rregulli i jetës kur ti nuk je”. Në “Blu Psalm”, Hodo vazhdon të eksplorojë temat e dashurisë, humbjes dhe shpirtit njerëzor. Poezitë e tij shpesh përfshijnë referenca ndaj autorëve të njohur si Fatos Arapi, Lasgush Poradeci, Giuseppe Ungaretti dhe Rainer Maria Rilke.
Komente
