Ligji që detyron studentët të punojnë për 3 vite në Shqipëri ka ulur me mbi 40% numrin e maturantëve që kanë zgjedhur të konkurrojnë për Mjekësinë e Përgjithshme.
Ky është viti i parë që zbatohet ky ligj, i cili u miratua pas shumë debatesh në shtator të vitit të kaluar. Ai detyron çdo maturant që aplikon për Mjekësi të nënshkruajë një kontratë me shtetin, ku angazhohet të qëndrojë e të punojë në Shqipëri për të paktën tre vite pas përfundimit të studimeve.
Por qëndrimi i detyruar me ligj në vend, duke se ka bërë që shumë maturantë të heqin dorë nga kjo degë. Në universitetet publike, nga 2035 aplikantë që ishin në vitin 2024, këtë vit janë vetëm 1202. Pjesa tjetër që kanë zgjedhur Mjekësinë, kanë aplikuar në universitetet private, ku edhe pse do të kenë një faturë më të shtrenjtë, të paktën nuk do të kenë kufizimin për t’u larguar jashtë pas studimeve.
Ata që kanë zgjedhur mjekësinë në shtet, shprehen të vetëdijshëm se do t’u duhet të respektojnë kushtet e kontratës, nëse e fitojnë të drejtën e studimeve.
"Është ok për sa kohë jemi duke dhënë provimin, jemi dakord me kushtet", thotë një maturant.
Nga ana tjetër, prindërit duket se ia kanë lënë në dorë vetë fëmijëve zgjedhjen e degës së studimit, pavarësisht kushteve.
“Nuk kam ndërhyrë fare. Unë i kam plotësuar vetëm dëshirën.
Jemi të gatshëm që fëmijët tanë të qëndrojnë këtu. Shqipëria ka nevojë për mjekë”, thonë prindërit.
Në kuadër të procesit konkurrues të pranimit si studentë të mjekësisë së përgjithshme, kandidatët zhvilluan testin elektronik në ambientet e Qendrës së Shërbimeve Arsimore. Ai përbën 30% të totalit të pikëve, ndërsa 70% llogariten nga rezultatet e shkollës së mesme. Universiteti i mjekësisë ka 436 kuota të lira. Për të marrë pjesë në këtë test, çdo aplikant ka paguar tarifë 5000 lekë, ndërsa testimi do të zhvillohet në grupe të ndara deri më 22 gusht.
Komente
Shume mire kane bere qe jane terhequr. Ka studente shume te talentuar qe e kane marre noten me zotesi pa qene te bijte e ndonjerit apo te ndonje tjetri dhe futeshin me mik ne universtitet. Te pakten rritet probabiliteti qe te kete tamam mjek te afte ne te ardhmen jo me 10 nga babi e mami.
Përgjigju