KUKËS-Në Kukës ka nisur puna për ndërtimin e stadiumit të ri të qytetit. Në nisje të punimeve kryetari i ri i Bashkisë Safet Gjici, njëherazi edhe president i klubit, tha se ky investim i përket gjithë kuksianëve, ekipit të qytetit, por edhe gjithë sportdashësve nga Shqipëria e Kosova.
"Projekti i plotëson të gjitha standardet e UEFA-s për të luajtur të gjitha ndeshjet në shtëpinë tonë. Ekipi i Kukësit prej një viti i luan ndeshjet jashtë, pasi stadiumi aktual nuk i plotësonte kushtet. Urojmë që të na ecë mbarë. Bashkia do të jetë çdo ditë me strukturat e veta për të ndjekur punën. Qytetarëve kuksianë ju uroj ta gëzojnë stadiumin e ri, pasi mjaft kanë pritur", tha Gjici.
Vlera e investimit është 5 milionë euro. Stadiumi do të ketë 8 mijë vende, ndërsa pjesë e tij do të jenë dhe ambientet akomoduese. Ky stadium është i parametrave të UEFA-s dhe parashikohet që të zhvillohen ndeshjet ndërkombëtare. Punimet do të zgjasin 15 muaj.
Komente
