Fermerët e bashkive Peqin, Rrogozhinë dhe Kavajë, këtë verë nuk do të kenë më shqetësim ujitjen e tokave të tyre bujqësore.
Qeveria shqiptare, në bashkëpunim me njësitë vendore, ka nisur nga puna për rehabilitimin e kanalit ujitës Peqin-Kavajë, një ndër veprat më të rëndësishme hidroteknike, në shërbim të ujitjes, i ndërtuar kryesisht në periudhën 1952-1965, me një gjatësi rreth 40 km.
Punimet për këtë vepër u inspektuan nga Ministrja e Bujqësisë, Anila Denaj, Drejtuesi Politik i PS për Qarkun e Tiranës, Erion Veliaj, kryetari i Bashkisë së Rrogozhinës, Edison Memolla dhe deputeti i PS, Etjen Xhafaj. Veliaj e cilësoi jetik një investim të tillë, që do të ndikojë në rritjen e prodhimeve bujqësore dhe me impakt të drejtpërdrejtë në turizëm.
“Nën drejtimin e Kryeministrit Rama, Shqipëria ka bërë një kthesë të jashtëzakonshme kur vjen puna për turizmin dhe bujqësinë. Në qoftë se më përpara i kishim njëshifrore arritjet në këto fusha, sot i kemi dyshifrore. Lumi Shkumbin i jep jetë gjithë zonës së Shqipërisë së Mesme. Mund të kemi disa kohë me shi të jashtëzakonshëm, dhe ndërkohë mund të kemi kohë të tjera ku nuk bie pikë shiu, dhe për këtë arsye, këto kanale janë jetike. Këto janë venat dhe arteriet tona. Në qoftë se kolesteroli bllokon venat e njeriut, plehrat që hedhim bllokojnë venat e një komuniteti të tërë. Këto janë venat më të cilat ushqehet ‘trupi’ i bujqësisë sonë. Prandaj, kjo që po bëjmë këtu është vërtet një operacion. Por, nëse komuniteti hedh prapë bagëti të ngordhura, plehra nga dritarja, atëherë do të thotë se kemi ndryshuar infrastrukturën, por nuk kemi ndryshuar kulturën. Në qoftë se ministria ka për detyrë të zhbllokojë 40 mijë kilometra kanale, ne kemi detyrë të zhbllokojmë 4 centimetra; duhet të kuptojmë se me këtë punë jetojnë shumë njerëz, ushqehet një Shqipëri e tërë, ushqehen turistë, çojmë për eksport, prodhojmë financa, rritet vlera e pronës”, deklaroi ai.
Drejtuesi Politik i PS për Qarkun e Tiranës u shpreh se do të ndërmerret edhe një fushatë ndërgjegjësimi nëpër shkolla dhe komunitet për ruajtjen e këtyre investimeve.
“Kur ecën bashkë infrastruktura dhe kultura, vërtet kemi bërë një vepër që do ngelet. Po të kemi mentalitet fitues dhe mentalitet pastërtor për këtë akt patriotik, që është bujqësia dhe turizmi, atëherë dashurinë për atdheun duhet ta shpjegojmë kështu: atdheu është ky investim, sepse me këtë pjesë të atdheut lulëzon mirëqenia e gjithë Shqipërisë së Mesme”, u shpreh Veliaj.
Ministrja e Bujqësisë, Anila Denaj tha se ky kanal shërben për ujitjen e rreth 8,000 ha tokë bujqësore në bashkitë Peqin, Rrogozhinë dhe Kavajë.
“Me këtë investim përfundojmë jo vetëm një objektiv të qeverisë për të ndihmuar sistemin, por mbi të gjitha ruajmë 8 mijë hektarë në 3 bashki dhe kjo është ajo që vlen. Bashkëpunimi me pushtetin vendor është absolut. Edhe ne këtë bashkëpunim e shikojmë edhe në këto pjesët e tjera të vogla, që ndoshta në pamje të parë janë ndërhyrje të vogla në kanalet bujqësore, por pa e koordinuar punën sëbashku, pushtet qendror-pushtet vendor, ne nuk ia dalim dot që të përfundojmë një vepër për të gjithë përfituesit që janë pronarët e tokës”, tha Denaj.
Deputeti i PS, Etjen Xhafaj u shpreh se ky investim përmbush një kërkesë të banorëve të këtyre zonave. “Është një kanal, i cili e sjell ujin nga Çengela e Peqinit deri në zonën e Syneit. Ka qenë e domosdoshme të bëhej kjo ndërhyrje, e cila prek të gjithë banorët e kësaj zone, duke filluar nga zona e Sinaballit në Rrogozhinë, në Lekaj dhe Gosë dhe Sigurisht, synimi ynë është të vazhdojmë me riparimet, për të kaluar pastaj në sjelljen e ujit në zonën e Luzit të vogël dhe Syneit të Kavajës, e cila në fakt e kompleton këtë vepër që ka shumë dekada që është kështu. Në një farë mënyrë e kthen në efiçencë të plotë tokën”, deklaroi Xhafaj.
Kryetari i Bashkisë së Rrogozhinës, Edison Memolla vlerësoi bashkëpunimin e vazhdueshëm mes pushtetit vendor dhe atij qëndror për të çuar përpara projekte të tilla në dobi të komunitetit. Ky kanal është i rëndësishëm për bujqësinë, pasi shërben si burim ujor për funizimin me ujë për ujitje të rrjetit.
Drejtuesi Politik i PS për Qarkun e Tiranës, Erion Veliaj, së bashku me ministren e Bujqësisë, Anila Denaj dhe deputetin e PS, Etjen Xhafaj, zhvilluan një takim me fermerët në Kavajë. Veliaj u shpreh se falë vëmendjes së shtuar të qeverisë, sektori i bujqësisë po gjeneron një pjesë të mirë të ekonomisë së vendit. Sipas tij, me shtimin e numrit të turistëve, edhe pesha e bujqësisë do të vijë gjithnjë e në rritje.
“Nëse do të vazhdojmë projektet e turizmit dhe ajo që Kryeministri ka shpallur, që në 2030-ën të shkojmë nga 10 milionë në 20 milionë turistë, do të thotë se në 4-5 vitet e ardhshme do të rritemi me 20-30% e turizmit çdo vit. Në Tiranë kemi kaluar nga një situatë ku ne kishim sezon turistik vetëm gushtin, tashmë ne kishim sezon të plotë edhe nëntorin, se ishin festat e Pavarësisë dhe Çlirimit, kishim edhe dhjetorin se ishin festat e Vitit të Ri, dhe po shkojmë në një turizëm që do të vazhdojë gjithë vitin. Kjo do të thotë se se ka nevojë për të pasur struktura si agro-turizmi. Pra, edhe bujqësi, edhe turizëm, meqë sot Shqipëria po bëhet fenomen”, tha ai.
Drejtuesi politik PS në Qarkun e Tiranës nënvizoi se qeveria ka mbështetur financiarisht bujqësinë në vlera që nuk janë dhënë asnjëherë më parë.
“Për herë të parë kemi një injeksion të jashtëzakonshëm financash në bujqësi, që nuk ka qenë më përpara. Mund të mos mjaftojnë, por nëse më përpara thoshim kush e ka fajin, tani themi si mundet të gjithë bashkë të bëjmë pjesën tonë. Nëse nuk e kuptojmë që kjo është një kauzë e madhe kombëtare, atëherë do ngelet thjesht si një nga 100 punët që po bëjmë. Nëse e adoptojmë këtë kauzë si kauzën tonë familjare, mund të prodhojmë histori suksese, që viti 2023 na provoi që është e mundur. Imagjino ç’mund të jetë 2024, në qoftë se ne përgatitjet i bëjmë që tani në janar”, deklaroi. ai.
Veliaj u bëri thirrje fermerëve që të bashkëpunojnë dhe të grupohen për shitjen e prodhimeve të tyre bujqësore si një mundësi për të rritur të ardhurat.
“Ne si bashki ia kemi parë hajrin bashkimit sepse tipikisht bashkimi prodhon fuqi shtesë, që nuk është vetëm shuma aritmetike e fuqive të vogla, por është edhe një fuqi eksponenciale, që vjen nga energjia që prodhon bashkimi, nga cytja me njëri-tjetrin. Mbaj mend kur ishim 27 njësi vendore, nuk bëhet fjalë që të lidhej rruga e Bërzhitës me rrugën e Krrabës, se një ishte i PS-së, një i PD-së. Ai thoshte: “Po ta bëj unë, do marrë lavdi dhe ky”. S’bëhej rruga kurrë nga Lapidari deri në Krrabë. Po ashtu edhe ura që lidhte Ndroqin me Vaqarrin, Ura e Mnikut: Njëri thoshte ti je i majtë, tjetri ti je i djathtë, dhe ura nuk bëhej kurrë. Kur bashkohesh, ti thua ka një vendimmarrje, mund të jetë më shumë punë për ata që janë në drejtim, por ama nuk ka nga këto cic mic-et ku secili del më i dobët nga konflikti, kurse nga bashkëpunimi del më i fortë”, theksoi Veliaj.
Ministrja e Bujqësisë, Anilaj Denaj nënvizoi se një vëmendje të veçantë në këto 10 vite i është kushtuar investimeve në bujqësi. Ajo siguroi se në 2-3 vitet e ardhshme, qeveria do të financojë edhe 200 mln euro të tjera.
“Në 10 vite qeverisje janë rehabilituar argjinatura gati 100 km, janë rehabilituar rezervuare, janë rehabilituar gjithë infrastruktura e ujitje-kullimit, me një total vlere gati 259 mln euro dhe do të vazhdojmë në 2-3 vitet e ardhshme me të tjera 200 mln euro në infrastrukturë. Sot jo vetëm kemi turistë vendas dhe të huaj që kërkojnë produkte më cilësore sepse është një kërkesë e kohës. Ne i kemi të gjitha mundësitë që t’i prodhojmë produktet tona. Por, nga ana tjetër, për t’i certifikuar produktet tona dhe për t’i çuar në tregjet elitare, ne nuk mund të shkojmë në investime shumë të vogla”, deklaroi Denaj, teksa kërkoi një bashkim të fermerëve.
Deputeti Xhafaj u shpreh se bujqësia ka një vend të veçantë në bumin turistik që Shqipëria përjetoi vitin që lamë pas.
“Ne kemi një vit jashtëzakonisht të suksesshëm turizmi vitin 2023, i cili ishte një vit i cili ishte sukses edhe falë punës suaj, përpjekjeve, lodhjes suaj dhe sigurisht falë dhe atij prodhimi që e ka bërë Shqipërinë një nga produktet më të mira turistike në rajon, por dhe në gjithë Evropën”, deklaroi Xhafaj.
