Nga kjo e hënë e deri më 2 tetor 2025, Shqipëria mirëpret Javën Kulturore Hungareze, një ngjarje shumëdimensionale që zhvillohet në kuadër të Javëve Kulturore Ndërkombëtare, me mbështetjen e Ministrisë së Turizmit, Kulturës dhe Sportit të Shqipërisë. Aktivitetet do të organizohen nga Ambasada Hungareze në Tiranë dhe do të shpalosin një mozaik të pasur me ngjarje që ndërthurin artin, sportin, modën, historinë dhe gastronominë.
Java nis me prezantimin e sportit inovativ Teqball, i shpikur në Hungari në vitin 2014 – një ndërthurje mes futbollit dhe tenisit të tavolinës, i luajtur mbi një tavolinë të lakuar. Aktivitetet zhvillohen në Shkollën e biçikletave dhe në Parkun e Madh të Liqenit në Tiranë, ku do të dorëzohen dy tavolina Teqball si dhuratë nga Ministria e Punëve të Jashtme të Hungarisë. Sportistë të rinj, amatorë dhe profesionistë do të kenë mundësinë të provojnë këtë lojë dinamike që promovon lojë të ndershme, shkathtësi teknike dhe një stil jetese të shëndetshëm.
Në datën 30 shtator, vëmendja zhvendoset te figura e Mbretëreshës Geraldinë, ku në maternitetin me të njëjtin emër, do të dorëzohet një vepër arti e realizuar nga artistja hungareze Anna Konya, si homazh për trashëgiminë humane dhe shpirtërore të Mbretëreshës. Ceremonia përfshin edhe shpërndarjen e çmimeve të konkursit të vizatimeve për fëmijë, frymëzuar nga jeta dhe vlerat e Mbretëreshës, me pjesëmarrjen e Princ Lekës II.
Më 1 tetor, kultura hungareze ngjitet në skenën e Hotel Rogner në Tiranë me një gala të madhe ku moda, gastronomia dhe muzika bashkohen në një mbrëmje të vetme. Stilistja Adry Balogh sjell koleksionet e saj elegante nga Adry Couture, ndërsa dy nga kuzhinierët më të njohur hungarezë, Chef Bela Prohaszka dhe Chef Balazs Mucsi, prezantojnë një menu tradicionale të shoqëruar me verë dhe pije tradicionale hungareze. Mbrëmja pasurohet me artin folklorik të artistes Eva Sztako Istvanne Kovacs Dr, e cila ekspozon vizatime dhe qëndisje tradicionale nga rajoni i Kalocsës, dhe kulmon me performancën energjike të grupit të njohur Flaska Banda, që sjell muzikë popullore autentike hungareze përmes instrumenteve tradicionale dhe ritmeve të “dance house”.
Java përmbyllet më 2 tetor në qytetin e Vlorës, në Teatrin “Petro Marko”, me ekspozitën fotografike “Aromë Hungarie” të fotografit Roland Tasho. Ekspozita sjell një udhëtim vizual mes të shkuarës dhe të ardhmes përmes imazheve që dokumentojnë arkitekturën ikonike të kryeqytetit hungarez. Muzika live e Flaska Band shoqëron ngjarjen, duke krijuar një atmosferë të veçantë ku arti pamor dhe muzika tradicionale bashkohen për të sjellë emocion dhe ndjeshmëri kulturore.
Java Kulturore Hungareze 2025 është një shprehje e miqësisë mes Hungarisë dhe Shqipërisë, dhe një mundësi për publikun shqiptar që të eksplorojë nga afër identitetin, traditat dhe energjinë krijuese të një prej kulturave më të pasura të Evropës Qendrore. Falë mbështetjes së Ministrisë së Turizmit, Kulturës dhe Sportit të Shqipërisë, këto ditë shndërrohen në një platformë të vërtetë shkëmbimi dhe dialogu kulturor mes dy vendeve.
Komente
