Presidenti Donald Trump u tha gazetarëve në Zyrën Ovale të premten se mund të vendosë tarifa reciproke “që sot” ndaj Kanadasë, duke përmendur tarifat kanadeze mbi eksportet amerikane të produkteve të bulmetit dhe drurit.
“Kanadaja na ka shfrytëzuar për vite me radhë me tarifat mbi drurin dhe produktet e bulmetit – 250%, askush nuk flet kurrë për këtë, 250% tarifë, që po përfiton nga fermerët tanë,” tha Trump gjatë fjalës së tij në Zyrën Ovale.
“Ne do të veprojmë – ata do të përballen me të njëjtën tarifë përveç nëse e heqin – dhe kjo është ajo që do të thotë ‘reciproke’ – dhe mund ta bëjmë këtë që sot, ose do të presim deri të hënën apo të martën, por këtë do të bëjmë.”
Të enjten, presidenti firmosi urdhra ekzekutivë që shtyjnë për gati një muaj tarifat mbi të gjitha produktet nga Meksika dhe Kanadaja që mbulohen nga traktati i tregtisë së lirë USMCA, një tërheqje e rëndësishme nga plani kryesor ekonomik i administratës, i cili ka tronditur tregjet, bizneset dhe konsumatorët.
Por në deklaratat e tij të premten, ai la të kuptohej se ishte i gatshëm të zgjeronte tarifat edhe ndaj partnerëve të tjerë tregtarë nëse nuk do të shihte ndryshime në politikat tregtare.
“Kjo ka qenë shumë e padrejtë ndaj... vendit tonë – nga një këndvështrim ekonomik, financiar dhe tregtar – na kanë shfrytëzuar plotësisht pothuajse të gjitha vendet e botës,” tha ai.
“Nuk mund të shesësh asgjë në Indi, është pothuajse, pothuajse e ndaluar, në fakt është e ndaluar. Ne bëjmë shumë pak biznes atje. Ata kanë rënë dakord, nga ana tjetër, duan t’i ulin shumë tarifat tani, sepse më në fund dikush po i ekspozon për atë që kanë bërë – e njëjta gjë vlen për Kinën, e njëjta gjë vlen për shumë vende të tjera.”
Komente
