Presidenti i Botswanës, Duma Boko, ka shpallur gjendje emergjente në sektorin e shëndetësisë, mes mungesës së theksuar të barnave dhe pajisjeve mjekësore në vend.
Në një fjalim të transmetuar drejtpërdrejt në televizion, Presidenti Boko njoftoi një plan shumëmilionësh për të rregulluar zinxhirin e furnizimit me ilaçe, duke përfshirë edhe mbikëqyrjen nga ushtria. Ai theksoi se përballimi i kësaj krize do të jetë “jashtëzakonisht i ndjeshëm ndaj kostos, për shkak të fondeve të kufizuara që ka shteti”.
Botsvana, një nga prodhuesit më të mëdhenj të diamantëve në botë dhe me një popullsi prej 2.5 milionë banorësh, po përjeton një rënie ekonomike të ndjeshme pas tkurrjes së tregut ndërkombëtar të diamantëve dhe shkurtimit të ndihmës nga SHBA. Kjo situatë ka sjellë papunësi dhe varfëri në rritje, sipas burimeve mediatike.
“Puna do të vijojë pa ndërprerje deri në rregullimin e plotë të gjithë zinxhirit të prokurimit”, u shpreh presidenti Boko, duke konfirmuar se Ministria e Financave ka miratuar një fond emergjent prej 18.3 milionë dollarë amerikanë.
Presidenti 55-vjeçar, i diplomuar në Harvard, erdhi në pushtet pas fitores historike të partisë së tij Umbrella for Democratic Change (UDC) në zgjedhjet e fundit, duke i dhënë fund një sundimi 58-vjeçar të partisë paraprake. Ai kishte deklaruar më herët se prioriteti i tij kryesor do të ishte rindërtimi i një ekonomie tepër të varur nga diamantët.
Komente
