Godina e Sarajeve të Toptanëve, një nga perlat arkitektonike në zemër të Tiranës, do t’i rikthehet publikut e transformuar në një muze.
Kryebashkiaku i Tiranës, Erion Veliaj, ndau në një postim në rrjete sociale historinë e shpëtimit të kësaj godine historike nga një zjarr i qëllimshëm katër vite më parë dhe rrugëtimin që nisi më pas për ta kthyer në një Muze Etnografik, si pasqyrë e trashëgimisë tiranase.
Dëmet e mëdha u shmangën fal ndërhyrjes dhe pikasjes nga Policia Bashkiake, ndërsa institucioni që Veliaj drejton mori përsipër transformimin e saj dhe kthimin në një atraksion turistik dhe historik.
Kryebashkiaku që qëndron me urdhër të SPAK i paraburgosur prej 10 shkurtit të këtij viti, thekson se tani është radha e Muzeut Etnografik të Tiranës, për të cilin “mezi pret të shndërrohet së shpejti në portën e njohjes së traditave dhe kulturës nga turistët”.
Postimi i plotë i kryebashkiakut Erion Veliaj në Facebook:
“4 vite më parë, një person u fut nga dera e pasme e godinës së Sarajeve të Toptanëve dhe hodhi një shishe me benzinë brenda saj, me qëllimin për ta djegur. Për fat, një koleg i Policisë Bashkiake e raportoi menjëherë aktin dhe në pak minuta zjarrfikësja e Tiranës e shuajti zjarrin e asaj që mund të kishte patur fatin e shkollës ‘Kosova’.
Atë natë vendosëm se kjo godinë ikonike në zemër të qytetit tonë, e cila mbart një vlerë të jashtëzakonshme të traditës dhe kulturës sonë, duhej marrë nën administrimin e Bashkisë së Tiranës, për t’ia rikthyer publikut të transformuar, e hapur për t’u vizituar nga të gjithë. Nisëm menjëherë punën për shpronësimin e saj dhe ia dolëm ta kryejmë në pak kohë.
Më pas, i erdhi radha realizimit të projektit të asaj që do të jetë Muzeu Etnografik i Tiranës - një tjetër xhevahir për qytetin, e frymëzuar nga tradita e Tiranës, si dëshmi e trashëgimisë kulturore. Mezi pres që Muzeu Etnografik i Tiranës të shndërrohet së shpejti në portën e njohjes me traditat dhe kulturën tiranase për turistët e shumtë që vizitojnë qytetin tonë”.
Postimi i kryebashkiakut Erion Veliaj në Facebook, për Sarajet e Toptanëve dhe Muzeun Etnografik të Tiranës
Komente
Bukur shume! Mezi po presim qe ta shikojme te mbaruar. Pune te mbare!
Përgjigju