LUSHNJE- Dy biznese që dëmtonin shtratin e dy lumenjve, Seman dhe Shkumbin janë gjobitur nga Inspektorati Kombëtar i Mbrojtjes së Territorit.
Gjoba ndaj tyre është 2 mln lekë, pasi nxirrnin inerte nga shtratet e lumenjve. Gjithashtu është vënë nën hetim personi A.H, 45 vjeç, banues në lagjen 1 Maji, Kuçovë i cili merrte materialin inert pa leje në shtratin e lumit Seman, në fshatin Salcë, Kozare.
"IKMT, gjatë kontrollit përgjatë rrjedhës së lumit Seman, fshati Murriz u konstatua se një subjekt kryente veprimtari të marrjes së materialit inert pa leje në shtratin e lumit Seman. Ndaj këtij subjekti, IKMT mori masë administrative me gjobë 2 milion lekë, për shkeljen e kryer.
IKMT, gjatë kontrollit përgjatë rrjedhës së lumit Shkumbin, bashkia Lushnje konstatoi se njē tjetër subjekt kryente veprimtari të marrjes së materialit inert pa leje në shtratin e lumit Shkumbin. Ndaj këtij subjekti, IKMT mori masë administrative me gjobë 2 milion lekë, për shkeljen e kryer.
IKMT dhe Policia e Shtetit vijon punën evidentimin dhe parandalimin e ndotjes mjedisore në lumenjtë e vijat ujore në vend si dhe ndëshkimin e çdo kundërvajtësi, dhe njëkohësisht fton çdo qytetar të denoncojë shkeljet në numrin 112 ose përmes Komisariatit Dixhital", njofton IKMT.
