Drejtori rajonal i OBSH-së për Evropën, Hans Kluge ka paralajmëruar evropianët që të udhëtojnë me përgjegjësi dhe kujdes gjatë këtij sezoni veror, pasi pavarësisht se numri i infektimeve nga COVID-19 është ulur, ende nuk jemi jashtë rrezikut.
“OBSH bën thirrje të keni kujdes, pasi grumbullimet, lëvizshmëria e madhe e popullsisë, festivalet e mëdha dhe aktivitete sportive që do të zhvillohen javët e ardhme mund të jenë të rrezikshme”, tha Kluge.
Gjatë dy muajve të fundit, rastet e reja të infektimeve dhe viktimave nga COVID-19 janë ulur ndjeshëm, duke bërë që 36 nga 53 vendet e rajonit të fillojnë zbutjen e masave anti-COVID.
“Ne duhet të shohim përparimin që kemi bërë sa i përket COVID-19, po nga ana tjetër nuk duhet të mendojmë se kemi dalë jashtë rrezikut.”, shprehet ai.
Kluge u shpreh se nuk është çudi qe Evropa të përfshihet sërish nga një valë e COVID-19, pavarësisht se procesi i vaksinimit po vijon.
Organizata Botërore e Shëndetësisë, ka qenë ajo që i ka tërhequr vëmendjen vendeve të tregohen solidar në këtë “luftë” me pandeminë dhe të dhurojnë doza vaksinash për vende të cilët kanë nevojë.
Tashmë në vendet evropiane procesi i vaksinimit po kryhet me sukses dhe përpjekjet për t’i dhënë fund pandemisë po marrin formën e duhur.
