OBSH deklaroi se numri i rasteve të reja me COVID-19 është rritur në Evropë pas 6 javësh rënie.
“Javën e kaluar, rastet me COVID-19 janë rritur me 9% në Evropë, pra 1 milionë më shumë. Kjo solli fundin e 6 javëve premtuese në të cilat kishte një rënie të infektimeve. Tani gjysma e rajonit tonë po përballet me një rritje të numrit të rasteve të infektimeve nga virusi.” tha Drejtori rajonal i OBSH-së në Evropë Hans Kluge, në një konferencë për shtyp.
Klege theksoi se konstatohet një rritje kryesisht në Evropën Qendrore dhe Lindore.
“Ne po konstatojmë një rritje në Evropën Qendrore dhe Lindore. Rastet e reja janë rritur gjithashtu edhe në disa vende të Evropës Perëndimore ku përqindja ka qenë shumë e lartë”, tha ai.
Rajoni i OBSH-së në Evropë përfshin 53 shtete dhe vaksinimi ka nisur në 45.
Për sa i përket vaksinimit, 2.6 përqind e popullsisë së Bashkimit Evropian ka marrë dy dozat e vaksinës kundër COVID-19 dhe 5.4 përqind ka marrë një dozë.
