Asambleja e Përgjithshme e Kombeve të Bashkuara ka miratuar dy rezoluta që mbështesin Ukrainën. E para, e hartuar nga Ukraina dhe aleatët e saj evropianë, u miratua me 93 vota pro, 65 abstenime dhe 18 vota kundër, në kuadër të përvjetorit të tretë të pushtimit rus.
E dyta, e propozuar nga Shtetet e Bashkuara dhe e miratuar me amendamentet e Bashkimit Evropian, kaloi pas një votimi të ndarë, ku amendamentet u pranuan me 78 vota pro, 16 kundër dhe 67 abstenime në një rast, dhe 60 pro, 18 kundër dhe 81 abstenime në rastin tjetër. Këshilli i Sigurimit i OKB-së pritet të votojë më vonë gjatë së hënës për rezolutën e SHBA-së.
Asambleja e Përgjithshme e OKB-së ka riafirmuar mbështetjen e saj për sovranitetin dhe integritetin territorial të Ukrainës, duke refuzuar çdo përpjekje për të legjitimuar ndryshimet e kufijve me forcë.
Një amendament i paraqitur nga Rusia për të ndryshuar rezolutën amerikane u refuzua nga shumica e vendeve anëtare. Kundër tij votuan 71 vende, 59 u abstenuan dhe 31 e mbështetën. Shtetet e Bashkuara kishin kërkuar rrëzimin e të gjitha amendamenteve, por amendamentet e propozuara nga BE u pranuan nga Asambleja e Përgjithshme.
Shtetet e Bashkuara bëjnë thirrje për “përfundimin e shpejtë të konfliktit dhe më tej kërkojnë një paqe të qëndrueshme midis Ukrainës dhe Federatës Ruse”.
Rezoluta e hartuar nga SHBA nuk përmend agresonin e Rusisë ndaj Ukrainës, i cili filloi tre vjet më parë.
Sekretari amerikan i Shtetit, Marco Rubio tha të premten se rezoluta “tregonte se ky konflikt është i tmerrshëm, se OKB-ja mund të ndihmojë në përfundimin e tij dhe se paqja është e mundur”.
“Kjo është mundësia jonë për të ndërtuar një rrugë të vërtetë drejt paqes,” tha sekretari Rubio në një deklaratë.
Rezoluta ukrainase thotë se agresioni rus “ka vazhduar për tre vjet dhe vazhdon të ketë pasoja shkatërruese dhe afatgjata jo vetëm për Ukrainën, por edhe për rajone të tjera dhe stabilitetin global”.
Kievi bën thirrje për “ndërprerje të armiqësive dhe një zgjidhje paqësore të luftës kundër Ukrainës” dhe thekson nevojën që lufta të përfundojë këtë vit.
Projekt-rezoluta e Ukrainës thotë se rezolutat e mëparshme të miratuara nga Asambleja e Përgjithshme duhet të zbatohen plotësisht, duke përfshirë ato që bëjnë thirrje që Rusia të tërhiqet plotësisht nga kufijtë e njohur ndërkombëtarisht të Ukrainës.
Rezolutat e Asamblesë së Përgjithshme nuk janë ligjërisht detyruese, por ato tregojnë mbështetjen morale të komunitetit ndërkombëtar.
Në Këshillin e Sigurimit, një rezolutë që të miratohet ka nevojë për mbështetjen e të paktën nëntë nga 15 anëtarët dhe asnjë nga anëtarët e përhershëm, Britania, Kina, Franca, Rusia ose Shtetet e Bashkuara, të mos përdorin të drejtën e vetos. Rezoluta e SHBA-së pritet të ketë mbështetje të mjaftueshme të hënën.
Këto votime në OKB mbahen ndërsa presidenti francez Emmanuel Macron viziton Shtetet e Bashkuara për bisedime me Presidentin Donald Trump që pritet të përfshijnë luftën në Ukrainë.
Macron tha javën e kaluar se ai do t’i thoshte presidentit Trump se udhëheqësi i SHBA “nuk mund të jetë i dobët” përballë presidentit rus Vladimir Putin.
Kryeministri britanik, Keir Starmer do të vizitojë Uashingtonin më vonë këtë javë për bisedime të ngjashme dhe ashtu si zoti Macron ai ka theksuar nevojën që sovraniteti i Ukrainës të jetë në qendër të çdo përpjekjeje për paqe.
Një grup udhëheqësish duke përfshirë Presidenten e Komisionit Evropian Ursula von der Leyen, Presidentin e Këshillit Evropian Antonio Costa, kryeministrin kanadez Justin Trudeau, kryeministren e Danimarkës Mette Frederiksen dhe kryeministrin e Spanjës Pedro Sanchez vizituan Kievin të hënën në shenjë mbështetjeje për Ukrainën.
“Ne jemi sot në Kiev, sepse Ukraina është Evropa”, tha von der Leyen në rrjetin social X.
“Në këtë luftë për mbijetesë, nuk është vetëm fati i Ukrainës që është në rrezik. Është fati i Evropës”, thekson ajo.
Luftimet vijuan edhe këtë të hënën me Rusinë që tha se rrëzoi 23 dronë ukrainas gjatë natës, duke përfshirë 16 mbi rajonin e Oryol-it.
Guvernatori i rajonit Ryazan, Pavel Malkov tha se rënia e mbeturinave nga një dron i rrëzuar ukrainas shkaktoi një zjarr në një ndërmarrje industriale.
Ushtria e Ukrainës tha të hënën se rrëzoi 113 nga 185 dronët që Rusia përdori në sulmet gjatë natës.
Komente
