Sekretari i Përgjithshëm i OKB, Antonio Guterres ka shprehur shqetësim të thellë për acarim kohët e fundit të konfliktit ushtarak në Sirinë jug-perëndimore, përfshirë edhe ofensivat tokësore dhe bombardimet.
Guterres bëri thirrje për ndaljen e menjëhershme të operacioneve ushtarake, duke kërkuar nga të gjitha palët të respektojnë detyrimet e tyre ndaj ligjit ndërkombëtar, ligjit humanitar, përfshirë mbrojtjen e civilëve dhe të infrastrukturës civile.
Në korrik 2017 Jordania ndërmjetësoi një armëpushim në Sirinë jugore mes Shteteve të Bashkuara dhe Rusisë. Por qeveria siriane nuk ka nënshkruar marrëveshjen për qetësimin e situatës.
Autoritetet siriane vazhdojnë të hedhin fletushka në zonë me paralajmërimet për opozitën: dorëzohuni ose vdisni. Në fillim të muajit Departamenti i Shtetit nxori një deklaratë ku shpreh shqetësim lidhur me acarimin e konfliktit dhe mban përgjegjëse Rusinë për të bindur Damaskun t'i përmbahet armëpushimit.