OSBE ka reaguar për situatën që po ndodh me televizionin News24 prej disa ditësh, kur për shkak të përfundimit të kontratës për qiranë e godinës, televizionit iu ndërpreu edhe sinjali i transmetimit.
Përfaqësuesi OSBE-së për Lirinë e Medias, Jan Braathu, në një reagim në Facebook ka shprehur shqetësim për situatën e krijuar.
Ai thotë se mosmarrëveshjet për pronën mes pronarit të televizionit dhe shtetit, nuk duhet të çojnë në ndërprerjen e sinjalit të transmetimit.
“Situata rreth ndërprerjes së papritur të veprimtarisë së Focus Media Group në Shqipëri është shqetësuese. Mosmarrëveshjet pronësore të biznesit nuk duhet të çojnë në ndërprerjen e menjëhershme të transmetimit të medias”, është shprehur Braathu.
Gazetarët dhe punonjësit u ndaluan të hyjnë në godinë. Edhe sendet e tyre të punës janë nxjerrë nga ambientet e televizionit dhe u dërguan në Rezervat e Shtetit dhe u protokolluan. Drejtori i televizionit ka të drejtën t’i tërheqë këto materiale, sipas një shkrese të Ardit Veliut, administratori i shoqërisë KAYO që ka marrë në zotërim godinën e pretenduar.
Por Gjykata e Tiranës, katër ditë më parë vendosi që gazetarëve t’u kthehen materialet që u morën nga godina e televizionit.
Të njëjtin qëndrim mbajti pak ditë më parë edhe zyra e Bashkimit Evropian në Tiranë, që tha se gazetarët nuk duhet të pengohen në punën e tyre.
Situata me News24 është krijuar për shkak se televizionit i ka skaduar prej 3 vitesh afati i qirasë për godinën shtetërore. Televizioni ka nisur disa transmetime amatore në rrugë duke përdorur internetin.
Komente
Cfare lesh OSBE ka mbi 30 vjet qe rrine ketu duke marre rroga te majme.Ju leverdis qe te kete probleme ne zgjedhjet qe te vazhdojne te rrine ketu dhe bejne sikur japin rekomandime per permiresimin e legjislacionit.Edhe ketu thote mosmarreveshje per pronesine plehra.
Përgjigju