Sekretari i Jashtëm i Mbretërisë së Bashkuar, David Lammy në vizitën e tij shprehu mbështetjen e mbretërisë së bashkuar ndaj rrugës integruese të Kosovës. Mesazhin ai e dha krah presidentes Vjosa Osmani më të cilën zhvilloi një takim pas atij me kryeministrin në detyrë Albin Kurti. Ai tha se Britania e Madhe do të vijojë të mbështesë Kosovën fuqishëm në muajt e ardhshëm.
“Është e rëndësishme që të shohim Kosovën të bëjë progres në rrugën e saj euroatlantike. Padyshim ne në mbretërinë e bashkuar ju mbështesim për anëtarësimin në Këshillin e Europes dhe shpresojmë që të jeni shpejt gati që të përmbushni kërkesat e të tjerave. Procesi i Berlinit është një mundësi për të rritur lidhje brenda dhe mes vendeve te rajonit dhe Europes Perëndimore dhe do te bëjmë çdo gjë që kemi në dorë për te avancuar në këtë drejtim në muajt e ardhshëm”, thekson Lammy.
Ndërkohë Mbretëria e Bashkuar pret nja angazhim më rigoroz nga qeveria e re sa i takon procesit të dialogut për normalizimin e marrëdhënieve.
“Ne duam një normalizim paqësor dhe qe zgjat për ju këtu ne Kosovë mes jush dhe Serbisë. Britania e Madhe është një kontributor domethënës në KFOR, i cili është thelbësor për sigurinë tuaj. Unë shpresoj qe qeveria e ardhshme do te adresoje te gjitha nevojat e qytetareve duke përfshirë edhe progresin ne integrimin e serbeve. Presim gjithashtu qe te këtë angazhim rigoroz ne dialogun e udhëhequr nga BE”, tha ai.
Presidentja Osmani tha se Serbia ka qenë minuese e procesit të normalizimit me veprimet apo mosveprimet e saj, sidomos duke mos nxjerrë përgjegjësit e sulmeve terroritste dhe destabilizuese të ndodhura në Kosovë përpara përgjegjësisë.
"Kosova mbetet një palë konstruktive, e përkushtuar për paqe dhe stabilitet, pavarësisht se vazhdimisht përballemi me obstruksione dhe provokime nga ana e Serbisë, përfshirë edhe sulmet e njëpasnjëshme që kanë filluar vite më herët dhe po vazhdojnë edhe tani, për ç’gjë dua ta përmend sërish se është e domosdoshme që të ketë llogaridhënie dhe vënie të autorëve para përgjegjësisë nga ana e Serbisë”.
“Por, fatkeqësisht po e shohim se nuk ka asnjë lëvizje në këtë drejtim, as sa i përket aktit të agresionit të shtatorit 2023, as sa i përket sulmit ndaj 93 ushtarëve të NATO-s, që ka ndodhur edhe më herët, po as edhe veprimeve të fundit terroriste që kanë ndodhur në veri të vendit”, është shprehur ajo.
Presidentja Osmani, i ka propozuar të mërkurën sekretarit të Jashtëm të Mbretërisë së Bashkuar lidhjen e një marrëveshjeje për mbrojtje dhe për ekonomi ndërmjet dy vendeve.
Kurti flet për Radoiçiçin
Të martën mbrëma, kryediplomati britanik u prit në Prishtinë nga kryeministri në detyrë i Kosovës, Albin Kurti, dhe ministrat e Qeverisë së tij. Kurti ka biseduar me Lammyn, ndër të tjera, rreth situatës aktuale në rajon dhe asaj gjeopolitike në Evropë, si dhe për çështjet e sigurisë, ka bërë të ditur Zyra e Kryeministrit.
Kreu në detyrë i ekzekutivit kosovar "theksoi faktin që ende nuk ka drejtësi dhe llogaridhënie për sulmin terrorist në Banjskë, teksa Millan Radoiçiç endet i lirë dhe i mbrojtur nga aparati shtetëror serb", thuhet në komunikatën e Kryeministrisë.
Në shtator të vitit të kaluar, Prokuroria Speciale e Kosovës ngriti aktakuzë ndaj 45 personave - në mesin e tyre edhe Millan Radoiçiç - për sulmin e armatosur ndaj Policisë së Kosovës në Banjskë më 24 shtator të vitit 2023, kur kishte mbetur i vrarë rreshteri Afrim Bunjaku.
Autoritetet në Serbi nuk pranojnë ta ekstradojnë Radoiçiçin në Kosovë dhe thonë se ai do të gjykohet nga “gjykatat serbe”, ndërsa zyrtarët në Kosovë thonë se ato i kanë ofruar mbrojtje atij. Kurti ka shtuar se Radoiçiç "duhet të ekstradohet në Kosovë ku do të ballafaqohej me një gjykim të drejtë për veprat e tij".
Lammy ndodhet për vizitë zyrtare në Kosovë, në kuadër të një turneu në Ballkanin Perëndimor, që, sipas Qeverisë së Mbretërisë së Bashkuar, ka për qëllim kyç forcimin e bashkëpunimit në luftimin e imigracionit të parregullt dhe krimit të rëndë të organizuar.
Komente
