Në datën 15 prill do mbahet seanca e e parlamentit të ri pas zgjedhjeve të mbajtura në 9 shkurt. Analisti Valon Arifi tha në ‘Sot Live në Shqipëri’, se Lëvizja Vetvendosje nuk ka ende një propozim apo një emër për kryetarin e ri të Kuvendit.
“Rrjedhimisht duhet të ishte zgjedhur kryetari i Kuvendit. Deri më tani Lëvizja Vetvendosje ende nuk e ka propozuar një emër, por mendoj se do të jetë i njëjti Glauk Konjfuca, kryetari aktual. Dhe pastaj konstituohet Kuvendi, deputëtët marrin mandatin dhe fillojnë afate ligjore për krijimin e qeverisë që i takon LVV, e cila nuk e ka të sigurt numrin shumicë prej 61 deputetësh, duke mos përfshirë Listën Serbe, që asnjë nga partitë në Kosovë nuk e ka llogaritur në listën e tyre”, tha Arifi.
Më tej ai shtoi se një emër i përfolur për këtë post mund të jetë edhe Fatmir Limaj, lideri i Nismës Socialdemokrate, por megjithatë ende nuk ka asgjë konkrete.
“Është përfolur se Fatmir limaj mund të jetë kandidat për këtë post. Por nuk mendoj se LVV bën pazare me një parti që numëron vetëm 3 deputetë. Mendoj që LVV nuk do të emëroj një kryetar kuvendi nga ndonjë aleatë tjetër”, shtoi ai.
Teksa u pyet nga gazetari Nertil Agalliu në lidhje me zgjedhjet presidenciale që do të mbahen vitin e ardhsëm Arifi u përgjigj se partitë mesa duket se nuk pëlqejnë të përfshihen në krijmin e qeverisë së re.
“Partitë duken se nuk përfshihen në krijmin e qeverisë së re, e cila duket se nuk do të zgjasë më shumë se një vit, pasi në mars të vitit të ardhshëm presidentes Vjosa Osmani i skadon mandati dhe duhet minimalisht 2/3 e votave nga Kuvendi, për të zgjedhur presidentin/en e ri”, tha analisti.
Sa i përket lajmeve nëse ka një krisje në LDK, Arifi nënvizoi se më shumë ka një debat të brendshëm, për manipulim votash të kandidatëve për deputetë. Megjthëse sipas tij kjo situatë nuk do të çojë LDK-në të ketë një koalicion të mundshëm me Albin Kurtin.
Në fund të intervistës analisti tha se deri më sot asnjë aktor psh si SHBA nuk është përfshirë në krijimin e qeverisë së re.
Komente
