Kryetari i Aleancës Kosova e Re (AKR), Behgjet Pacolli, ka realizuar një vizitë në Hagë, ku takoi ish-krerët e UÇK-së që ndodhen në paraburgim.
Në një postim në Facebook, Pacolli bëri të ditur se gjendja morale dhe fizike e ish-presidentit Hashim Thaçi ishte e mirë, duke shprehur besimin e tij në procesin gjyqësor.
“Sapo përfundova vizitën time në Hagë. Presidenti ishte moralisht dhe fizikisht mirë! Shpresojmë dhe besojmë në drejtësi,” shkroi Pacolli.
Kjo vizitë e Pacollit vjen në një kohë kur procesi gjyqësor ndaj ish-krerëve të UÇK-së në Gjykatën Speciale të Hagës po vazhdon.
Pacolli është një prej liderëve politikë që ka mbështetur publikisht drejtësinë për ish-pjesëtarët e UÇK-së.
Gjykata Speciale në Hagë është krijuar për të trajtuar akuzat për krimet e supozuara lufte dhe krime kundër njerëzimit, të ngritura ndaj disa liderëve të ish-Ushtrisë Çlirimtare të Kosovës.
Kjo gjykatë ka ngjallur diskutime dhe ndasi në opinionin publik, me disa që e shohin si të nevojshme për drejtësi dhe të tjerë që e konsiderojnë të padrejtë ndaj luftës së Kosovës për liri. /Telegrafi/
