Pamje mbresëlënëse na vijnë nga Razma, e mbuluar nga velloja e bardhë e dëborës. Razma është një nga destinacionet më të preferuara gjatë stinës së dimrit.
Në këto pamje të ndara nga kryeministri Edi Rama shihen edhe turistë që shijojnë Razmën nën petkun e borës.
Rama fton vizitorët dhe të pasionuarit pas alpinizmit ta vizitojnë këtë destinacion.
“MIRËMËNGJES dhe me këto pamje të pyjeve të Razmës që bëhen edhe më magjike nën qilimin e dëborës, ju uroj një ditë të mbarë”, shkruan Rama.
Rruga për në Razëm është mjaft panoramike, me fshatrat e vegjël që duken rrëzë maleve. Në dy anët e saj në dimër shihen fushat e zëna nga bora. Gjatë ngjitjes në rrugën malore, nuk mund të humbisni pamjet spektakolare të natyrës dhe maleve.
Razma është një fshat i vogël, rrethuar me pyje të dendur ahu dhe pishe, që të lënë pa fjalë me madhështinë, ngjyrat dhe bukurinë e tyre. Razma është kthyer në një nga pikat turistike më të preferuara, ku shkojnë të gjithë e në çdo stinë, e jo vetëm nga qyteti i Shkodrës.
