Me hapjen e panairit kombëtar të librit “Kukës Script” në sheshin e Kullës së Qëndresës, kanë nisur të shtunën pasdite aktivitet përkujtimore “Eksod 99”, të cilat çdo vit mbahen me 16 prill. Në këtë panair, i mundësuar nën kujdesin e kryetarit të Bashkisë Kukës, Bashkim Shehu, marrin pjesë 60 botues nga Shqipëria, Kosova, Maqedonia, Mali i Zi, e diaspora.
Është panairi i parë i nivelit kombëtar e më gjerë që organizohet në qytetin e Kukësit, në prag të ditës së përkujtimit të mikpritjes së madhe dhe bujarisë të vëllezërve kosovarë,16 prill 99. Në hapjen e panairit kryebashkiaku i Kukësit theksoi:
Kukësi është urë lidhëse e kombit dhe ne do të punojmë për shtrirjen e kufijve. Panairi kombëtar i librit synohet të kthehet ndër ngjarjet më të mëdha kulturore të sezonit turistik e jo vetëm, duke sjellë edhe shkrimtarë të shquar, personalitete nga jeta politike dhe kulturore.
Kryebashkiaku, Bashkim Shehu
Në ditët e panairit do të ketë paraqitje të veçanta për shkrimtarë të afirmuar nga Shqipëria dhe Kosova. Panairi, është organizuar nga Shoqata “ Durana”, do të jetë i hapur deri më 16 prill.