Në panairin e “Work & Study”, në Pallatin e Kongreseve në Tiranë, Elham Sadiki, 18 vjeç shikon për mundësitë që i ofrohen për studim dhe punësim, edhe pse thotë se të ardhmen e mendon jashtë vendit.
“Jashtë me duket sikur ka më shumë mundësi. Pra me duket sikur pagat janë më të larta se sa në Shqipëri, si dhe sistemi. Në fakt këtu në Shqipëri sistemi është pak i rrëmujshëm edhe do më shumë procedura, ka më shumë procedura” , tha ai.
Në kontrast me Elhamin, Danjela, edhe kjo në gjimnaz profesional, është e sigurt që të ardhmen ta ndërtojë në Shqipëri, duke parë edhe mundësitë e shumta sipas saj.
“Studioj në degën shërbim social shëndetësor. Ëndrra e çdo mjeku është prirur drejt Gjermanisë, por pse jo në Shqipëri? Do të ishte shumë mirë të qëndronim sepse në fund të ditës në jemi rinia se duhet të qëndrojmë dhe ti japim frymë vendit tonë”, thotë Danjela.
Apelin për të rinjtë që të qëndrojnë e ka Kryetari i Dhomës së Tregtisë dhe Industrisë Tiranë, i cili e cilëson të padrejtë perceptimin se në Shqipëri mungojnë mundësitë e punësimit.
“Janë inxhinieritë që kërkohen shumë, IT që kërkohen shumë, ekonomistët, financierët, juristët. Janë mundësi të pafundme , është e kot të thuash se nuk gjen unë apo nuk gjen dot mënyrën për të kërkuar punë. Kjo është e papranueshme”, shprehet Nikolin Jaka, Kryetari i Dhomës së Tregtisë dhe Industrisë Tiranë.
Ky është edicioni i 16-ti radhazi i panairit “Work and Study”, ndërsa këtë vit në Pallatin e Kongrese janë mbi 80 biznese që ofrojnë mbi 5 mijë vende të lira pune por edhe promovohen nga institucionet arsimore oferta të ndryshme në fushën e Arsimit dhe Formimit Profesional.
Komente
Me vjen shum keq qe genjeni E kam buurin ne shtepi me 2 mastre dhe rezultate te shkeqyera ka mbaruar kkntabilitet finance dhd eshte pa pune
Përgjigju