Më tolerante me bizneset dhe më e ‘butë’ me taksat. Ky është koncepti i ‘Paqes fiskale’ të premtuar nga kryeministri Edi Rama si pjesë e programit qeverisës nëse merr votat e 11 majit për një mandat të katërt.
Lehtësia e parë fiskale lidhet me biznesin e madh, me të cilin qeveria parashikon negociojë prej muajit qershor të këtij viti, për një ulje në tatimin mbi fitimin, që aktualisht është 15%. Sipas programit të socialistëve, çdo biznes që deklaron fitime nga viti në vit, nw të njëjtën vlerë me rritjen ekonomike tw vendit, do të vijojë të tatohen mbi këtë fitim, 15%. Lehtësia krijohet për ato biznese që arrijnë fitime vjetore më shumë se sa përqindja e rritjes ekonomike të vendit. Për çdo fitim shtesë që biznesi do të deklarojë mbi normën e rritjes ekonomike, do të tatohet me 5%.
Sipas kryeministrit Edi Rama, kjo lehtësi fiskale për biznesin e madh, nënkupton edhe një “marrëveshje paqeje” me ta, pasi përgjatë këtyre 3 viteve, do të marrin fund inspektimet dhe kontrollet në çdo biznes.
Për ta ilustruar me një shembull: nëse fitimet e një biznesi vjet në raport me vitin 2023 u rritën 4% aq sa ishte rritja ekonomike, tatimi mbi fitimin mbetet 15%, ndërsa nëse rritja e fitimit do të ishte 5%, tatimi për diferencën e fitimit prej 1% do të jetë 5%.
Kjo nuk është një amnisti fiskale, siç kjo “paqe” e deklaruar nga Rama është lexuar nga shumë ekspertë. Për të shtuar fitimin vjetor, që do t’i përkthehej në leverdinë e tatimit me 5% për çdo rritje mbi normën ekonomike, biznesi i madh është i detyruar të justifikojë fitimin e deklaruar.
Kjo paqe 3-vjeçare fiskale synon të nxisë bizneset të heqin dorë nga bilancet e dyfishta dhe të nxjerrin në dritë të ardhurat e padeklaruara, për të shmangur tatimin mbi fitimin. Rritja e deklarimeve, rrjedhimisht do të shtonte të ardhurat në buxhet nga tatimet dhe njëkohësisht do të ulë informalitetin.
Aktualisht tatimin mbi fitimin 15% e paguan vetëm biznesi i madh, ndërsa biznesi i vogël me xhiro deri në 14 milionë lekë, do të vijojë i përjashtuar nga tatimi deri në 2029-ën.
Komente
