Vetëm pak ditë përpara samitit të ardhshëm të NATO-s, si dhe në takimin me Presidentin rus Vladimir Putin, vëmendja e Presidentit Trump ishte tek një tjetër shqetësim për NATO-n. Ai foli gjatë një tubimi në shtetin Montana.
“Do takohem me anëtarët e NATO-s dhe do t’u them, ‘Duhet të filloni të paguani faturat. Shtetet e Bashkuara nuk do të përballojnë çdo gjë. Ne paguajmë nga 70 – 90% të kostos për mbrojtjen e Evropës dhe nuk ka problem. Sigurisht që ata na shkatërrojnë në tregti dhe në gjëra të tjera; na e bëjnë të pamundur të bëjmë biznes në Evropë. Megjithatë vijnë dhe na shesin Mercedesët dhe BMW-të. Pra, kemi 151 miliardë dollarë defiçit tregtar me BE-në. Dhe si qershia mbi tortë, na rrënojnë edhe përmes NATO-s”, deklaroi Presidenti Trump.
Presidenti Trump ka ngritur pikëpyetje në mënyrë të përsëritur rreth rolit të SHBA-së në NATO.
Pas tensioneve që u shfaqën rishtazi mes Presidentit Trump dhe udhëheqësve të tjerë të G-7ës gjatë samitit të Kanadasë, shumë shqetësohen për një krisje të mundshme mes udhëheqësve të NATO-s javën e ardhshme, gjë prej të cilës do të përfitonte Presidenti rus Vladimir Putin, i cili do të takohet me Presidentin Trump në Helsinki, më 16 korrik.