Nure Dreni, gjyqtare pranë Gjykatës së Posaçme të Apelit për Korrupsionin dhe Krimin e Organizuar, do të dalë në datën 3 mars para Komisionit të Pavarur të Kualifikimit, për t’u njohur me rezultatet e verifikimit të pasurisë, pastërtinë e figurës dhe aftësitë profesionale. Trupa gjykuese që po shqyrton dosjen e gjyqtares Dreni përbëhet nga Suela Zhegu, Olsi Komici dhe Xhensila Pine. Për gjyqtaren procesi i verifikimit ka nisur që në 15 maji të vitit 2018.
Në vitin 2019, Nure Dreni dha dorëheqjen nga gjykimi i dosjes së anëtarëve të bandës së Emiliano Shullazit, me argumentin se kishte qenë e angazhuar në një proces të mëparshëm ndaj anëtarëve të grupit.
Nure Dreni ka qenë edhe pjesë e trupës gjykuese të Gjykatës së Apelit për Krimet e Rënda, e cila ka pranuar kërkesën e Izet Haxhisë, ish-truprojës së Sali Berishës, për rishyrtim të dosjes "Hajdari" në Gjykatën e Shkallës së Parë, me një tjetër trupë gjykuese nga ajo që e ka gjykuar më parë.
Disa ditë më parë, Nure Dreni është zgjedhur pjesë e trupës gjykuese në Gjykatën e Posaçme të Apelit për Korrupsionin dhe Krimin e Organizuar, që do të shqyrtojnë dosjen e Saimir Tahirit.
