Shumë prej tyre të zëshëm, e të tjerë që nuk folën kurrë në parlament, do të kenë ditët e fundit si deputetë, deri në korrik kur dyert e Kuvendit të mbyllen për t’u hapur në shtator për trupën e re të ligjvënësve.
Zgjedhjet e 11 majit kanë lënë jashtë, më shumë se gjysmën e sallës, 82 deputetë aktualë. disa prej të cilëve nuk ri-kandiduan për një mandat të radhës, e të tjerë që u futën në garën parlamentare, por dështuan të rizgjidhen.
Pjesa më e madhe prej tyre, nga radhët e socialistëve. Freskimi i listave me një gjeneratë të re nga Edi Rama la jashtë gati 60 përqind të deputetëve aktualë të maxhorancës.
Disa prej tyre as nuk ishin mes kandidatëve, ndërsa pjesa dërrmuese u hodh në fushë betejë, në listat e hapura. Në një garë të ethshme për pak vende, sallën e parlamentit të ardhshëm nuk do mund ta frekuentojnë me, një sërë emrash, që nga socialisti i Gardës së Vjetër Pandeli Majko i cili nuk arriti të thyente rezultatin e kolegëve të majtë në lista, apo Blerina Gjylameti që luftoi deri në kutitë e fundit për mandatin.
Vota të mjaftueshme për të marrë mandatin e tyre nuk arritën të merrnin as Toni Gogu, Ermonela Felaj, Etilda Gjonaj, Klotilda Bushka, Florenc Spaho apo Arben Pëllumbi.
Edhe nga opozita, mbetet po i lartë numri i atyre që nuk do të rikthehen në parlament. Jo aq për shkak të ndonjë rifreskimi brezash, se sa si reflektim i luftës së brendshme që gërreu për një kohë të gjatë Partinë Demokratike. Lulzim Basha dhe emra të tjerë që hynë në 2021 si figura drejtuese të PD-së, nuk do të jenë më. Së bashku me ta, dhe deputetët që nuk iu bashkuan që në fillim Berishës, me përjashtime të pakta. Kështu që edhe grupi i ardhshëm demokrat, do të zotërohet nga besnikët e kreut të PD-së.
Vetëm pak muaj, për të gëzuar privilegjet e të qenurit deputet, kanë mbetur dhe për drejtues apo ish drejtuesë të partive të vogla opozitare. Monika Kryemadhi e cila duket të jetë divorcuar përfundimisht edhe me politikën, Dashamir Shehi apo kreu i PDIU-së Shpëtim Idrizi që nuk siguroi dot as 1/3 e votave të 2021.
Me nisjen e legjislaturës së re, ndryshojnë edhe përfaqësuesit e PSD në parlament, që në këtë 4 vjeçar kanë qëndruar thuajse pasivë.
Komente
