Partia e Lirisë akuzon qeverinë për shpopullim të vendit dhe emigrim masiv të të rinjve.
Pëmes një deklarate për shtyp, Partia e Lirisë denoncon ato që sipas saj janë shkaqet e këtij fenonmeni.
Pagat e ulëta, problemet në arsim e shëndetësi si dhe korrupsioni dhe mungesa e meritokracisë, sipas PL, kanë çuar në braktisjen e vendit nga qytetarët.
Deklarata e zëdhënëses së Partisë së Lirisë, Jasmira Memelli:
Shqipëria po përballet me një prej krizave më të rënda të historisë së saj moderne, emigrimin masiv dhe të vazhdueshëm të qytetarëve. Raporti i fundit i Bankës Qendrore të Austrisë tregon se 10% e shqiptarëve duan të largohen që brenda këtij viti, ndërsa 33% brenda dekadës, shifra që e vendosin vendin tonë në krye të rajonit për dëshirën për t’u larguar.
Ky është pasqyrimi i një realiteti të hidhur, ku shqiptarët nuk e shohin më të ardhmen në atdhe, por jashtë kufijve të tij. Dhe kjo nuk ka ndodhur rastësisht.
Shkaqet e emigrimit masiv janë të qarta dhe të dhimbshme:
Varfëria dhe mungesa e mundësive.
Paga qesharake, punë të pasigurta dhe pamundësia për të mbuluar nevojat bazë kanë shtyrë mijëra familje drejt emigrimit.
Papunësia e lartë tek të rinjtë.
Universitetet po nxjerrin çdo vit mijëra të diplomuar që nuk gjejnë punë, ndërsa qeveria hesht dhe mbyll sytë.
Shëndetësia dhe arsimi në kolaps.
Mjekët dhe mësuesit po largohen në masë, sepse profesionet e tyre këtu nuk vlerësohen dhe nuk shpërblehen.
Korrupsioni dhe mungesa e meritokracisë.
Qytetarët e ndershëm ndihen të braktisur në një vend ku çdo derë hapet vetëm me lidhje, ndërsa sakrifica e tyre nuk shpërblehet kurrë.
Indiferenca e qeverisë është më e rëndë se çdo shifër. Prej më shumë se një dekade, emigrimi i shqiptarëve ka marrë përmasa dramatike, por në vend të politikave konkrete për ta frenuar, kemi parë vetëm propagandë boshe, premtime boshe dhe heshtje cinike. Kryeministri e di shumë mirë që shqiptarët po ikin, por kjo nuk e shqetëson, sepse boshllëkun e krijuar e përdor për të mbajtur pushtetin me pakicë të varfëruar dhe të nënshtruar.
Sot, tragjedia më e madhe është fakti se emigrimi nuk është më një vendim i detyruar në moment dëshpërimi, është bërë planifikim afatgjatë i shqiptarëve. Shumë familje e konsiderojnë ikjen si rrugën e vetme për një jetë më të mirë, dhe kjo është dëshmia më e hidhur e dështimit të shtetit.
Fshatra të tëra janë boshatisur, qytete të vogla janë tkurrur deri në shuarje, ndërsa nëpër shtëpi e rrugica të Shqipërisë mbeten vetëm të moshuar. Një brez i tërë po rritet larg vendit, me ëndrrat e tij të lidhura me një tokë tjetër, ndërsa Shqipëria rrezikon të mbetet një atdhe pa të rinj, pa shpresë dhe pa të ardhme. Ky është çmimi i indiferencës dhe i papërgjegjshmërisë së qeverisë.
Nëse qeveria do të kishte një strategji kombëtare për ndalimin e shpopullimit, jo me fjalë, por me masa konkrete për të krijuar punësim, për të rritur pagat dhe për të rikthyer dinjitetin e profesionistëve.
Një Investim real në arsim dhe shëndetësi, për të ndalur eksodin e mjekëve, infermierëve, mësuesve dhe të rinjve të kualifikuar.
Mbështetje për familjet e reja dhe politika që i bëjnë qytetarët të shohin të ardhmen këtu, jo diku tjetër.
Llogaridhënie nga qeveria për çdo vit të humbur, për çdo premtim të shkelur dhe për çdo shqiptar që është detyruar të largohet, sot Shqipëria do të ishte një vend i sigurt për qytetarët e saj.
Shqipëria nuk mund të vazhdojë të shkretohet ndërsa pushtetarët festojnë sukseset e rreme në ekrane. Nëse nuk veprohet tani, brenda pak vitesh, vendi do të përballet me një boshatisje dramatike dhe të pakthyeshme.
Partia e Lirisë ka një program të qartë dhe mëse të realizueshëm, 5 prioritete për katër milionë shqiptarë plus, ku fokusi kryesor është ndalimi i shpopullimit, për ta shndërruar Shqipërinë në një vend të sigurt dhe dinjitoz për qytetarët e saj.
Komente
Keta kane te drejte per ate qe thone se shpopullarizimi eshte veper e politikes por dhe keta qelbesira qe bejne te mirin tani qe jane ne opozite kur marrin pushtetin cuditerisht behen te njejtet me keta qe jane sot
Përgjigju