Superliga shqiptare mbylli dje sezonin 2022-23, me Partizanin që fitoi titullin numër 17-të në histori. Me pikë të barabarta me Tiranën (67), gjithçka u vendos pas shumatores së përballjeve direkte mes tyre.
Të udhëhequr nga italiani Giovanni Colella, "Demat" fituan 2-0 me Teutën në ndeshjen e fundit. Lajmi ka bërë jehonë edhe në Itali, teksa përtej Adriatikut vënë theksin te trajneri Colella, që bëhet i pari italian që feston këtë trofe në Shqipëri si trajner.
"Një sukses nga Giovanni Colella, trajneri italian që udhëhoqi ekipin drejt triumfit: ai është i pari nga bashkatdhetarët tanë që arrin të fitojë Superligën në Shqipëri. Për t'u theksuar duke pasur parasysh përfundimin në pikë të barabarta, teksa në fund vendosën përplasjet e drejtpërdrejta mes tyre", thuhet nga Tutto Mercato.
