Egnatia - Partizani, kjo është ndeshja e sotme që merr jetë në orën 19:00 në stadiumin e Rrogozhinës dhe vlen për gjysmëfinalen e parë mes tyre në Kupën e Shqipërisë.
Partizani sfidon kampionët në fuqi, teksa kanë emëruar në stol Skënder Gegën dhe klima në kampin e kuq është pozitive, gjë që u pa edhe pas fitores në kampionat kundër Laçit në fundjavë.
Trajneri Gega ka thënë se rrogozhinasit janë ekipi për t’u mundur, teksa ka zbuluar edhe detaje nga kontrata, e cila është dy vjeçare.
“Kam 2-3 ditë që kam patur mundësi të punoj me ekipin pas ndeshjes me Laçin. Ai takim ishte një leksion më vete sepse të gjithë e dinë se sa ndryshim ka mes ndeshjeve dhe seancave stërvitore. Për fatin e mirë nuk u ndëshkuam me Laçin në ato momente tona të këqija, por reaguam në pjesën e dytë. Eshtë shenjë e mirë për mua si trajner. Udhëtojmë në Rrogozhinë, është një ekip kampion, është një ekipi i mirë kanë investuar.
Kontrata - Në Shqipëri kurioziteti është i madh. Ishte koha shumë e shkurtër dhe nuk mund të pasqyronim çdo gjë. Me presidentin Demi dhe klubin kemi rënë dakord të firmosim një kontratë 2-vjeçare. Do jem për dy vite pjesë e projektit të Partizanit dhe jam shumë i lumtur që është kjo hapësirë dhe shpresoj që gjërat të shkojnë sa më mirë, sa më gjatë”, tha Gega.
Në kampin e Egnatias trajneri Edlir Tetova vlerësoi rivalët, por tha se koha për të përgatitur një ndeshje të tillë ka qenë e paktë.
“Janë shumë pak orë, por kjo është për të katërta ekipet që luajnë në gjysmëfinalen e Kupës. Grupi ka qenë në gjendje të mirë, nuk kemi pasur dëmtime, thjesht lëndime të lehta. Përveç Malotës dhe Ndrecës, pjesa tjetër e grupit është e plotë.
Shanset - Për çdo trajner kalimi i turit është mendimi numër një. Në Kupë jemi në garë me tre skuadrat, të cilat udhëheqim edhe kampionatin. Kandidatët kryesorë për ‘Final 4’. Nuk kam ndonjë skuadër të preferuar, fokusi është te ndeshja e radhës”, tha trajneri i Egnatias.
Komente
