TIRANË - Bylis dhe Partizani luajnë të hënën në orën 13:30 për javën e 17-të në Superligë. Kryeqytetasit kërkojnë tri pikë në Ballsh kundër një rivali të vështirë, kjo për t'u ngjitur sërish në krye të renditjes, pasi për momentin është Egnatia që prin Superligën.
Përpara medieve foli trajneri i Partizanit, Aleksandar Veselinovic. Serbi harroi dy barazimet radhazi dhe kërkon tri pikë kundër Bylis, një ekipi që pak ditë më parë mposhti Vllazninë në "Adush Muça".
"Pas barazimit ndaj Egnatias, vjen përballja ndaj Bylis - Çdo ndeshje që vjen është e ndryshme. Ne duhet të mendojmë vetëm përpara. Jam i sigurt që do të luajmë ndaj një tjetër skuadre shumë të mirë. Përpara një jave ata arritën 3 pikët ndaj Vllaznisë. Kanë dhuruar paraqitje mjaft të mira ndaj Egnatias, Vllaznisë. Ndeshjen e fundit me Elbasanin në pjesën e parë ata ishin në avantazh 1 – 0, por më pas u ndëshkuan me karton të kuq.
Kushtet e fushës së tyre janë disi të veçanta. Fakt është që ne ndryshojmë fushën nga bar artificial në bar natyral. E theksoj që janë një skuadër e mirë, por ne duhet të mendojmë për veten tonë. Si gjithmonë na duhet përqendrim dhe të fokusohemi në idetë tona.
Si është gjendja e skuadrës? Sot kemi për të zhvilluar edhe seancën e fundit stërvitore. Disa lojtarë janë në dyshim, gjithsesi vetëm pas stervitjes do të kem ide më të qarta kush do të jetë gati për nesër.
Objektivi Partizanit ndaj Bylis? Si gjithmonë. Ne kemi ambicjet tona, të jemi të qartë, duhet të jemi në nivelin e klubit dhe emrit Partizani kjo është ajo që synojmë", tha trajneri.
Partizani me 29 pikë mban vendin e dytë, një pikë pas Egnatias kryesuese. Ndërkohë Bylis me 13 pikë ndodhet në vendin e fundit.
