“Rebeli” Fan Noli nga Ilir Ikonomi, “Tri jetët e zotit P.” nga Virgjil Muçi, dhe “Vegjetariania” e nobelistes Han Kang janë titujt që sugjeron “Report TV” këtë fundjavë në rubrikën “Në Librari”.
PAS “APOSTULLIT”, IKONOMI SJELL NË TIRANË FAN NOLIN “REBEL”
Titulli: Rebeli
Autori: Ilir Ikonomi
Shtëpia botuese: UET Press
Çmimi: 1900 lekë
Një tjetër vëllim i rrallë e befasues për jetën e Fan Nolit. Pas librit “Apostulli”, autori Ilir Ikonomi, ish-gazetar i Zërit të Amerikës, vjen në Tiranë me një tjetër vëllim shterrues për Fan Nolin, me titull “Rebeli”. Edhe kësaj here, Ikonomi nuk zhgënjen, duke na dhënë një tjetër rrëfim interesant dhe të freskët për jetën e Fan Nolit në “folenë e grerëzave”, siç e quan autori xhunglën e politikës shqiptare të fillimviteve 1920. Libri sjell një mori detajesh të reja për Fan Nolin, që lexuesi i zbulon faqe pas faqeje, në këtë përshkrim të rrallë dhe befasues të njërës prej figurave më erudite dhe aktive shqiptare të shekullit të kaluar.
“TRI JETËT E ZOTIT P.”, NJË ROMAN PËR DASHURINË PËR PUSHTETIN
Titulli: Tri jetët e zotit P.
Autor: Virgjil Muçi
Shtëpia Botuese: Dituria
Çmimi: 1500 lekë
Numri i faqeve: 272
“Tri jetët e zotit P.” është një roman për dashurinë. Dashurinë e pakufishme dhe të patjetërsueshme të një njeriu për pushtetin mbi qeniet njerëzore në shprehjen e vet më të plotë, jo vetëm fizikisht, por edhe shpirtërisht. Edhe pse produkt i fantazisë dhe i trillit artistik, ky roman duhet këqyrur si një autopsi e shpirtit njerëzor, ngase ashtu si të gjitha autopsitë synon të nxjerrë në dritë të diellit të keqen e padukshme që fshihet nën epidermë.
NOBELISTJA HAN KANG NË SHQIP ME LIBRIN “VEGJETARIANIA”
Titulli: Vegjetariania
Autor: Han Kang
Shtëpia botuese: Onufri
Çmimi: 1000 lekë
Numri i faqeve: 196
Një roman i bukur dhe turbullues për rebelimin dhe tabunë, dhunën dhe erotikën, si dhe metamorfozën ngatërruese të shpirtit, “Vegjetariania” i autores koreane Han Kang është vlerësuar nga kritikët në mbarë botën dhe ëshët fitues i çmimit “Nobel” në letërsi dhe më herët i “Man Booker Prize”. Ky roman është një rrëfim Kafkian me një alegori të errët për pushtetin, maninë dhe luftën e një gruaje për t’u çliruar nga dhuna jashtë dhe brenda saj.
