NEW YORK – Pas goditjes me tarifat, Donald Trump mori një tjetër lajm të keq nga gjykatat federale amerikane: një gjyqtare ndaloi administratën e tij të zbatojë dëbimet e shpejta për personat e arrestuar larg kufirit jugor. Ky është një goditje për planin e Trump për deportime masive dhe shënon fillimin e një beteje të re me drejtësinë.
Çështja lidhej me një politikë të re të shpallur në janar nga ish-presidenti, i cili autorizoi Departamentin e Sigurisë së Brendshme të kryente dëbime të menjëhershme, kudo në vend dhe pa vendim gjykate, ndaj emigrantëve të gjetur pa dokumente që nuk mund të provonin se kishin jetuar në SHBA për më shumë se dy vjet.
Në fakt, ky lloj dëbimi i përshpejtuar (expedited removal) ishte përdorur edhe para Trump, por vetëm për persona të ndaluar në kufirin me Meksikën ose brenda një rrezeje prej 150 kilometrash nga ai, dhe vetëm brenda dy javëve nga hyrja e tyre e paligjshme. Në ato raste, mjaftonte një intervistë e thjeshtë me një agjent kufitar për të marrë vendimin e dëbimit. Trump e zgjeroi këtë praktikë në të gjithë territorin amerikan, gjë që ngriti shqetësime tek kushtetutalistët dhe organizatat e të drejtave civile, të cilët paralajmëruan se një sistem i tillë mund të ishte i rrezikshëm edhe për qytetarë amerikanë që nuk mund të provonin menjëherë statusin e tyre ligjor.
Vendimi i gjykatës e konfirmon këtë. Në një akt prej 48 faqesh, gjyqtarja Jia M. Cobb e Gjykatës së Distriktit të Kolumbias shkruan se administrata Trump veproi në mënyrë të nxituar, duke u përpjekur të largonte sa më shumë persona të ishte e mundur, duke rrezikuar shkeljen e të drejtës për proces të rregullt dhe ndalime të padrejta. Sipas saj, një procedurë që dikur përdorej vetëm për migrantët me lidhje të pakta me SHBA-të, u shndërrua në një praktikë standarde që zbatohej edhe në qytete si Nju Jorku, larg kufirit.
“Kur bëhet fjalë për persona që jetojnë brenda vendit – shkruan Cobb – vendosja e shpejtësisë mbi gjithçka tjetër do të çojë në mënyrë të pashmangshme që qeveria të dëbojë gabimisht njerëz”.
Vendimi ka hapur një përplasje të re me qeverinë. Departamenti i Sigurisë, i drejtuar nga Kristi Noem, reagoi duke thënë: “Vendimi injoron qartë autoritetet që i takojnë presidentit. Ne kemi nga ana jonë ligjin, faktet dhe arsyen e shëndoshë”. Sipas departamentit, dëbimet e shpejta ishin thjesht zbatimi i plotë i autoritetit që i jep ligji federal për të përfshirë të huajt e paligjshëm që ndodheshin në vend prej më pak se dy vitesh.
Qeveria e apeloi menjëherë vendimin, çka do të thotë vetëm një gjë: fjala e gjyqtares Cobb nuk do të jetë e fundit./ La Repubblica
Komente
DEPORTIMET TE PERSHPEJTOHEN MOR GJYKATA LESHI...SE E MBYTEN AMERIKEN EMIGRANTET E JASHTELIGJSHEM....ptu..rrace e poshter...
Përgjigju