Fluturimet janë anuluar, shkollat dhe bizneset janë mbyllur dhe mijëra njerëz janë detyruar të largohen nga shtëpitë e tyre ndërsa një nga tajfunët më të fortë të viteve të fundit po i afrohet Kinës jugore dhe Hong Kongut.
Supertajfuni Ragasa, me erëra pranë qendrës së tij prej rreth 220 km/orë, sipas observatorit të Hong Kongut, po udhëton përmes Detit të Kinës Jugore drejt provincës Guangdong, fuqisë ekonomike jugore të Kinës.
Deri më tani, të paktën tre persona kanë vdekur dhe më shumë se 17,500 të tjerë janë zhvendosur nga përmbytjet dhe rrëshqitjet e dheut në Filipine për shkak të stuhisë, e cila është kategorizuar si një "super tajfun".
Ragasa pritet të godasë me gjithë fuqinë në zonat bregdetare në qytetet Zhunai dhe Zhanjiang të Guangdong ditën e nesërme gjatë mesditës dhe mbrëmjes, raporton Qendra Kombëtare Meteorologjike e Kinës.
Të paktën gjashtë persona u plagosën dhe mbi 7,000 të tjerë u evakuuan në Tajvan kur tajfuni përfshiu jugun e ishullit, dhe mbi 8,000 familje mbetën pa energji elektrike, raportoi Agjencia Qendrore e Lajmeve.
Përveç tre personave që dihet se kanë vdekur, pesë të tjerë rezultojnë të zhdukur në Filipine për shkak të Ragasës, stuhisë më të fuqishme që ka goditur arkipelagun e Azisë Juglindore këtë vit.
Komente
