Pas fitores në zgjedhjet e 14 shkurtit, kryetari i Lëvizjes Vetëvendosje, Albin Kurti, ka pritur në takim ambasadorin e Shqipërisë në Kosovë, Qemal Minxhozi.
Në njoftimin e Ambasadës së Shqipërisë në Kosovë thuhet se ambasadori Minxhozi e ka përgëzuar Kurtin për fushatën e qetë zgjedhore, procesin e lirë dhe demokratik zgjedhor, pa incidente, si dhe fitoren e arritur në zgjedhjet e 14 shkurtit.
“Bashkëbiseduesit theksuan rëndësinë e rritjes dhe thellimit të marrëdhënieve mes dy vendeve, në të gjitha fushat e bashkëpunimit”, thuhet në njoftim.Nga ana tjetër Kurti ka bërë thirrje për bashkëpunim mes Qeverisë së Shqipërisë dhe Kosovës për kapërcimin e barrierave dhe burokracive për ndërtuar marrëdhënie model të bashkëpunimit në rajon, veçanërisht në fushën e ekonomisë."Dhe për këtë ai shprehu vullnetin dhe gatishmërinë e tij të plotë në funksion të realizimit të këtij qëllimi”, përfundon njoftimi i Ambasadës së Shqipërisë në Kosovë.
Fitoren e Lëvizjes Vetëvendosje dhe mbarëvajtjen e procesit zgjedhor në Kosovë e kanë uruar dhe përshëndetur edhe liderët e Shqipërisë, një ditë pas zgjedhjeve të jashtëzakonshme.
