Ministri gjerman i Ekonomisë dhe Energjisë, Peter Altmaier tha se ka hyrë në karantinë, pasi një punonjës i ministrisë rezultoi pozitiv nga testi për COVID-19.
Ministri Altmaier në një deklaratë nga llogaria e tij në Twitter tha se “mësova se ka rezultuar pozitiv testi për COVID-19 i një punonjësi të ministrisë, i cili mori pjesë në takimin e ministrave të Tregtisë së BE-së që u mbajt në Berlin. Si masë paraprake kam hyrë në karantinë në shtëpi”.
Dje ministri gjerman i Punëve të Jashtme, Heiko Mass hyri në karantinë pasi një prej truprojave të tij rezultoi pozitiv në testin e COVID-19.
Gjithashtu edhe kancelarja gjermane, Angela Merkel qëndroi në karantinë për 14 ditë në muajin mars pasi mjeku që i kishte dhënë injeksionin për vaksinën e gripit rezultoi pozitiv ndaj COVID-19.
