SHBA- Administrata Amerikane e Barnave dhe Ushqimit, FDA aprovoi për përdorim emergjent vaksinën anti-COVID, “Johnson and Johnson”.
“Ky është një lajm emocionues për të gjithë amerikanët dhe inkurajues në luftën e përbashkët kundër COVID-19”, tha presidenti i SHBA-së, Joe Biden.
Sipas provave dhe studimeve të zhvilluara vaksina “J&J” ka rezultuar mjaft efektive, por për sa i përket varianteve të reja ajo duket e “pafuqishme”, pasi është efektive deri 62%.
Kjo është vaksina e parë në botë e cila miratohet për aprovim dhe ka një dozë të vetme, në krahasim me çdo vaksinë tjetër e cila merret përmes 2 dozave.
E veçanta e kësaj vaksine është gjithashtu edhe prakticiteti që ofron në transport edhe në ruajtje, pasi nuk ka nevojë të qëndrojë në temperatura -70 gradë, si Pfizer.
Kompania farmaceutike ka paralajmëruar se vetëm 4 milionë doza do të mund të dërgojë menjëherë dhe se SHBA duhet të pres për pjesën tjetër të vaksinave anti-COVID për shkak të problemeve që po hasin në prodhim.
Kjo është vaksina e 3 e aprovuar për përdorim në SHBA, pas Pfizer dhe Moderna.
SHBA është vendi i parë në “listën e zezë” për sa i përket pandemisë. Numri total i infektimeve ka shkruar 29,202,824, ndërkohë që ai i viktimave është 524,669 në te gjithë vendin që nga fillimi i pandemisë.
Përveç FDA-së, “J&J” ka aplikuar në Agjencinë Evropiane të Barnave për përdorim në Evropë, megjithatë ende nuk është marrë një vendim.
