Tiranë- Pas shpalljes së pretencës nga SPAK për dosjen ‘Sterilizimi’, ka nisur edhe mbrojtja e të pandehurve, të cilëve iu pranua gjykimi i shkurtuar, duke veçuar çështjen nga ish-ministri Ilir Beqaj.
Gjatë fjalës së tij, Saimir Kadiu, ish-drejtor ekonomik i Ministrisë së Shëndetësisë, kërkoi të shpallet i pafajshëm, duke deklaruar se nuk ka lidhje me asnjë shpërdorim detyre që pretendon SPAK.
Për këtë ai i kërkoi gjykatës që të tregojë dhe një anekdodë.
“Lexova një anekdodë para ca ditësh, mori flakë pylli dhe u mblodhën gjithë kafshët, thanë po na dënon zoti se kemi bërë shumë mëkate. Luani tha unë psh. kam ngrenë shumë prej jush, ujku e dhelpra po ashtu, pastaj i erdhi radha gomarit dhe tha që pashë një lëndinë me bar të gjelbërt dhe vajta e hëngra, të gjitha kafshët thanë ky është gabimi më i rëndë dhe dënuan gomarin“.
I pyetur nga gjykata pse e tha këtë anekdodë, ish-zyrtari u shpreh:
“Kërkoj mos jem unë gomari!”.
Më 25 qershor SPAK shpalli pretencën për 8 të pandehur të dosjes Sterilizimi, një koncesion me vlerë 100 milionë euro, për të cilin po gjykohet në një proces më vete, ish-ministri i Shëndetësisë Ilir Beqaj.
SPAK kërkon 36 vite e 6 muaj burg për 8 të pandehurit. Për dy kryesorët, ish.zv ministrin e Shëndetësisë Klodian Rjepaj, dhe biznesmenin që fitoi tenderin e sterilizimit të pajisjeve mjekësore në shtet, Ilir Rrapaj, SPAK kërkoi dënimin me 10 vite burg për secilin. Nga Gjykimi i shkurtuar, të dyve u ulet 1/3-a dhe në rast se shpallen fajtorë nga gjykata e Posaçme, do të dënohen me 6 vite e 8 muaj burg.
Për, Marsela Serjani drejtoreshë juridike dhe Saimir Kadiu, drejtor ekonomik në ministri, Prokuroria e Posaçme kërkoi 3 vite e 6 muaj burg, që zbriten në 2 vite e 4 muaj për secilin.
Ndërkohë për 4 të pandehur të tjerë, dënimi me burg i kërkuar nga SPAK, pezullohet në shërbim prove. Mes tyre është edhe rektori i Universitetit të Mjekësisë, mjeku Arben Gjata, për të cilin SPAK kërkoi 2 vite burg, që nga gjykimi i shkurtuar zbret në 1 vit e 4 muaj, e që konvertohet në 3 vite shërbim prove në rast se do të dënohet nga gjykata e posaçme.
Komente
