Konfirmohet rasti i dytë i murtajës së ruminanteve të vegjël në njësinë administrative Martanesh, bashkia Bulqizë. Lajmi u bë i ditur për Report TV nga Bilbil Hoxha, Përgjegjës i Shërbimit Veterinar në Qarkun e Dibrës.
Sipas tij, sot kanë mbërritur përgjigjet e analizave nga laboratori i ISUV, të cilat rezultuan pozitive. Menjëherë specialistët e veterinarisë do të shkojnë në fermën e blegtorit Bajram Mata dhe do të eliminojnë 345 krerë bagëti.
Sakaq është vendosur ndalimi i transportit dhe tregtimit të bagëtive në distancën 10 kilometra nga kjo fermë.
Sëmundja virale që prek dhitë e delet konsiderohet e padëmshme për njerëzit, megjithatë mishi dhe qumështi janë rreptësisht të ndaluara në zonat e prekura nga murtaja.
Ky është rasti i dytë pas atij të Postribës në Shkodrës. Përhapja e sëmundjes është një kërcënim i drejtpërdrejtë për mijëra familje që jetojnë me blegtori.
Komente
